Won’t get Nobel for halting India-Pak war: Trump | నేను ఏం చేసినా నాకు నోబెల్ శాంతి బహుమతి రాదు అంటూ స్వయంగా అమెరికా అధ్యక్షుడు డోనాల్డ్ ట్రంప్ వ్యాఖ్యానించడం ఇప్పుడు తీవ్ర చర్చనీయాంశంగా మారింది.
ఎన్ని యుద్ధాలు ఆపినా, ఏమి చేసినా నాకు ఎందుకు నోబెల్ బహుమతి ఇవ్వరు అంటూ ఆయన ఒకింత ఆవేదన వ్యక్తం చేశారు. దీన్ని భట్టి ట్రంప్ కు నోబెల్ బహుమతి ఎంత ముఖ్యమో అర్ధం అవుతుంది.
అమెరికా విదేశాంగ కార్యదర్శి మార్కో రూబియోతో కలిసి తాను డెమోక్రటిక్ రిపబ్లిక్ ఆఫ్ ది కాంగో మరియు రిపబ్లిక్ ఆఫ్ రువాండా మధ్య హింసాత్మక రక్తపాతం మరియు మరణాలకు ప్రసిద్ధి చెందిన, దశాబ్దాలుగా కొనసాగుతున్న యుద్ధంలో ఒక అద్భుతమైన ఒప్పందాన్ని ఏర్పాటు చేసినట్లు ప్రకటించారు. రువాండా మరియు కాంగో నుండి ప్రతినిధులు సోమవారం వాషింగ్టన్‌లో పత్రాలపై సంతకం చేయడానికి వస్తారని ట్రంప్ పేర్కొన్నారు.
‘ఇది ఆఫ్రికాకు గొప్ప రోజు, నిజాయితీగా చెప్పాలంటే, ప్రపంచానికి గొప్ప రోజు! కానీ నాకు దీనికి నోబెల్ శాంతి బహుమతి రాదు, భారతదేశం మరియు పాకిస్తాన్ మధ్య యుద్ధాన్ని ఆపినందుకు నాకు నోబెల్ శాంతి బహుమతి రాదు, సెర్బియా మరియు కొసోవో మధ్య యుద్ధాన్ని ఆపినందుకు నాకు నోబెల్ శాంతి బహుమతి రాదు, ఈజిప్ట్ మరియు ఇథియోపియా మధ్య శాంతిని కాపాడినందుకు నాకు నోబెల్ శాంతి బహుమతి రాదు, మరియు మధ్యప్రాచ్యంలో అబ్రహం ఒప్పందాలను చేసినందుకు, పశ్చిమాసియాలో మొదటిసారిగా అన్ని దేశాలను ఏకం చేయడానికి కృషి చేస్తున్నా నాకు నోబెల్ శాంతి బహుమతి రాదు’ అంటూ ట్రంప్ ఆవేదన చెందారు.
ఈ మేరకు సోషల్ మీడియాలో ఒక పోస్ట్ చేశారు. రష్యా-ఉక్రెయిన్ మరియు ఇజ్రాయెల్/ఇరాన్ ఫలితాలు ఏమైనా సరే, తనకు నోబెల్ శాంతి బహుమతి రాదని, కానీ ప్రపంచంలో శాంతిని నెలకొల్పడానికి తాను చేస్తున్న కృషి, పడుతున్న తపన ప్రజలకు తెలుసని అదే తనకు ముఖ్యమైనదని ట్రంప్ వెల్లడించారు.
