– వృద్ధులు, ప్రియమైన వారిపై ప్రత్యేక శ్రద్ధ పెట్టండి..
– పక్షులను మరవొద్దు!
PM Narendra Modi heatwave precautions | దేశవ్యాప్తంగా ఉష్ణోగ్రతలు రికార్డు స్థాయిలో నమోదవుతూ, భయంకరమైన ఎండలతో ప్రజలు ఉక్కిరిబిక్కిరి అవుతున్న నేపథ్యంలో ప్రధానమంత్రి నరేంద్ర మోదీ స్పందించారు.
భారతదేశంలోని వివిధ ప్రాంతాలు ప్రస్తుతం విపరీతమైన వేడిని, దాని వల్ల ఎదురవుతున్న తీవ్రమైన సవాళ్లను అనుభవిస్తున్నాయని ఆయన పేర్కొన్నారు.
ఈ వేడి వాతావరణం ప్రతి ఒక్కరి ఆరోగ్యంపై తీవ్ర ప్రభావం చూపుతుందని ఆందోళన వ్యక్తం చేసిన ప్రధాని.. ప్రజలు సాధ్యమైనన్ని ఎక్కువ జాగ్రత్తలు తీసుకోవాలని సామాజిక మాధ్యమాల వేదికగా కీలక సూచనలు చేశారు.
ఎండ తీవ్రత ఎక్కువగా ఉన్నందున ప్రజలు అప్రమత్తంగా ఉండాలని, ప్రాణాపాయం కలిగించే వడదెబ్బ (Heatstroke) బారిన పడకుండా స్వయంగా జాగ్రత్తలు పాటించాలని మోదీ కోరారు.
ప్రధాని మోదీ సూచించిన ముఖ్యమైన జాగ్రత్తలు ఇవే..
ప్రతి ఒక్కరూ నిరంతరం తగినంత నీరు తాగుతూ శరీరాన్ని డీహైడ్రేషన్కు గురికాకుండా చూసుకోవాలి.
అత్యవసర పనులపై బయటకు వెళ్లేటప్పుడు తప్పనిసరిగా వెంట నీటి బాటిల్ను తీసుకెళ్లాలి.
ఎండలో ప్రయాణించే వారికి లేదా అవసరమైన సమయాల్లో ఇతరులకు తాగునీరు అందించి సహాయం చేయాలని ప్రధాని పిలుపునిచ్చారు.
తల తిరగడం, వికారం (వాంతులు వచ్చేలా ఉండటం) లేదా తీవ్రమైన అలసట వంటి వడదెబ్బ లక్షణాలు కనిపిస్తే అస్సలు నిర్లక్ష్యం చేయవద్దని, తక్షణమే జాగ్రత్తలు తీసుకోవాలని సూచించారు.
ఈ వేడిగాలుల (Heatwaves) సమయంలో ప్రధాని మోదీ మానవీయ కోణంలో మరికొన్ని కీలక సూచనలు చేశారు.
పెద్దల యోగక్షేమాలు తెలుసుకోండి.
తీవ్రమైన ఎండలు ఉన్నప్పుడు వీలైనప్పుడల్లా ఇంట్లో ఉండే వృద్ధులైన తల్లిదండ్రులకు, తాతామామ్మలకు అలాగే మనకు అత్యంత ప్రియమైన వారికి ఫోన్ చేసి వారి ఆరోగ్యం ఎలా ఉందో, యోగక్షేమాలు ఏంటో నిరంతరం అడిగి తెలుసుకోవాలని మోదీ అన్నారు.
మూగజీవాలపై కారుణ్యం.
ఈ భయంకరమైన వేడి వాతావరణంలో మన చుట్టూ ఉండే పక్షులు, జంతువులను కూడా గుర్తుంచుకోవాలని ప్రధాని కోరారు. వాటి దాహం తీర్చడం కోసం ఇంటి మేడలపై, గుమ్మాల ముందు నీటి పాత్రలను ఉంచాలని, మూగజీవాలను కాపాడుకోవాల్సిన బాధ్యత మనందరిపై ఉందని మోదీ గుర్తుచేశారు.
