- మారుమూల ప్రాంతాల్లోనూ నెట్వర్క్ గ్యారెంటీ
BSNL Launches Satellite Phone | మొబైల్ టవర్లు, సెల్యులార్ నెట్వర్క్లు అస్సలు లేని మారుమూల అడవులు, కొండ ప్రాంతాలు, సముద్ర తీరాలలో సైతం కమ్యూనికేషన్ సేవలను అందుబాటులోకి తెస్తూ ప్రభుత్వ రంగ టెలికాం దిగ్గజం బిఎస్ఎన్ఎల్ (BSNL) సరికొత్త విప్లవానికి తెరలేపింది.
దేశంలోనే మొట్టమొదటి సారిగా సాధారణ ప్రజలు/సంస్థల వినియోగం కోసం ఒక ప్రత్యేక శాటిలైట్ (ఉపగ్రహ) ఫోన్ను బుధవారం పరిచయం చేసింది. పన్నులతో కలిపి ఈ ఫోన్ ధరను రూ. 1,34,166 గా నిర్ణయించారు.
సాధారణ స్మార్ట్ఫోన్ల లాగా కాకుండా, ఈ పరికరం సాంప్రదాయ మొబైల్ టవర్లపై ఆధారపడకుండా నేరుగా అంతరిక్షంలోని ఉపగ్రహాల ద్వారా సిగ్నల్స్ అందుకుని పనిచేస్తుంది.
అందువల్ల ఆఫ్-గ్రిడ్ లేదా మారుమూల ప్రదేశాలకు ఇది అత్యంత నమ్మకమైన కమ్యూనికేషన్ సాధనంగా నిలవనుంది.
అయితే, ఈ ఫోన్ను మార్కెట్లోకి వెళ్ళి నేరుగా కొనుగోలు చేయడం కుదరదు. భారతదేశ భద్రతా నిబంధనల ప్రకారం.. ఈ శాటిలైట్ ఫోన్ను కొనుగోలు చేయడానికి లేదా ఉపయోగించడానికి ముందు కేంద్ర టెలికమ్యూనికేషన్ల విభాగం (DoT) నుండి ప్రత్యేక అనుమతి (Clear Authorization) పొందాల్సి ఉంటుంది.
Read Also: ‘జులై లో పుట్టండి.. టీమ్ ఇండియా కెప్టెన్ అవ్వండి!’
BSNL శాటిలైట్ ఫోన్ ఎలా పనిచేస్తుంది?
గ్లోబల్ శాటిలైట్ నెట్వర్క్ ప్రొవైడర్ అయిన ‘ఇన్మార్సాట్’ (Inmarsat) భాగస్వామ్యంతో BSNL ఈ అత్యాధునిక హ్యాండ్సెట్ను అభివృద్ధి చేసింది.
సాధారణ మొబైల్ నెట్వర్క్లు చేరలేని దట్టమైన అడవులు, మైనింగ్ ప్రాంతాలు లేదా విపత్తు సమయాల్లో నెట్వర్క్ పూర్తిగా స్తంభించిపోయినప్పుడు కూడా ఈ ఫోన్ ద్వారా వాయిస్ కాల్స్ చేసుకోవచ్చు.
కీలక ఫీచర్లు (Key Features): శాటిలైట్ కనెక్టివిటీ..
మొబైల్ టవర్ కవరేజ్ లేని ఏకాంత ప్రాంతాల నుండి నేరుగా ఉపగ్రహ కనెక్టివిటీ. మారుమూల ప్రాంతాల నుండి స్పష్టమైన వాయిస్ కాలింగ్ సదుపాయంతో పాటు, ఆపద సమయాల్లో అత్యవసర సహాయం కోసం SOS ఎమర్జెన్సీ అలర్ట్ ఫీచర్.
సుదీర్ఘ బ్యాటరీ లైఫ్..
ఛార్జింగ్ పెట్టుకునే వీలు లేని ప్రదేశాలలో ఎక్కువ రోజులు ఉపయోగించుకునేలా పవర్ఫుల్ బ్యాటరీ. ఎలాంటి కఠినమైన వాతావరణ పరిస్థితులనైనా, ప్రమాదాలనైనా తట్టుకునేలా అత్యంత దృఢమైన (Rugged & Durable) బాడీతో దీనిని నిర్మించారు.
ఈ ఫోన్ ఎవరికి ఉపయోగపడుతుంది?
ఈ శాటిలైట్ ఫోన్ సాధారణ కస్టమర్ల కోసం కాకుండా, అత్యంత క్లిష్టమైన వాతావరణంలో పనిచేసే నిర్దిష్ట రంగాలు, వ్యక్తుల కోసం డిజైన్ చేయబడింది.
రక్షణ రంగం (Defense) & విపత్తు నిర్వహణ (Disaster Response) బృందాలు, సముద్ర తీర కార్యకలాపాలు (Maritime Operations), నౌకాయానం చేసేవారు, మైనింగ్ (Mining) మరియు అడవుల్లో సాగే పారిశ్రామిక పనులు, ఏకాంత ప్రాంతాలు, కొండ కోనల్లో సాహస యాత్రలు (Adventure Trips) చేసే పర్యాటకులు, యాత్రికులకు ఈ శాటిలైట్ ఫోన్ చాలా ఉపయోగపడనుంది.
అవసరమైన DoT అనుమతులు లేకుండా శాటిలైట్ ఫోన్ను కలిగి ఉండటం లేదా ఆపరేట్ చేయడం భారతీయ చట్టాల ప్రకారం నేరం. దీనివల్ల చట్టపరమైన తీవ్ర పరిణామాలు ఎదుర్కోవాల్సి వస్తుంది.
ఈ సేవలకు సంబంధించిన మరిన్ని వివరాల కోసం కస్టమర్లు తమ సమీప BSNL కార్యాలయాన్ని సందర్శించవచ్చు
మరోవైపు, BSNL దేశవ్యాప్తంగా తన సాధారణ నెట్వర్క్ ను కూడా శరవేగంగా విస్తరిస్తోంది. ఇందులో భాగంగా ఇప్పటికే దేశవ్యాప్తంగా దాదాపు 99,000 4G సైట్లను విజయవంతంగా ప్రారంభించినట్లు సంస్థ వెల్లడించింది. వీటికి అదనంగా మరిన్ని 4G సైట్ల ఏర్పాటుకు అనుమతి ఇవ్వాలని ప్రభుత్వం కూడా యోచిస్తోంది.
