Dhanush Fan Club Official Flag Politics | కోలీవుడ్ స్టార్ హీరో, జాతీయ ఉత్తమ నటుడు ధనుష్ (Dhanush) పేరు ఇప్పుడు సామాజిక మాధ్యమాలలో మారుమోగిపోతోంది.
ఆయన అభిమాన సంఘం (Dhanush Fans Welfare Association) తాజాగా ఆవిష్కరించిన ఒక అధికారిక జెండా ఇటు సినీ వర్గాల్లో, అటు తమిళనాడు రాజకీయాల్లో సరికొత్త చర్చకు తెరలేపింది.
ఈ పరిణామంతో ధనుష్ కూడా భవిష్యత్తులో ప్రత్యక్ష రాజకీయాల్లోకి అడుగుపెట్టేందుకు గ్రౌండ్ వర్క్ సిద్ధం చేసుకుంటున్నారా? అనే ఊహాగానాలు గట్టిగా వినిపిస్తున్నాయి.
పొలిటికల్ టచ్తో ఉన్న జెండా.. రీ-కోడింగ్ చేస్తున్న నెటిజన్లు
అభిమాన సంఘం అఖిల భారత అధ్యక్షుడు, దర్శకుడు సుబ్రమణియం శివ, జనరల్ సెక్రటరీ బి. రాజా సమక్షంలో ఈ జెండాను ఆవిష్కరించారు.
ఎరుపు మరియు తెలుపు (Red and White) రంగుల కలయికతో రూపొందించిన ఈ జెండా మధ్యలో ధనుష్ ఇరుచేతులు జోడించి నమస్కరిస్తున్న భంగిమ, వెనుక స్టార్ (నక్షత్రం) గుర్తు ఉన్నాయి. దీనిపై తమిళంలో “ఎన్నం పోల్ వాళ్కై” (మన ఆలోచనలే మన జీవితం) అనే క్యాప్షన్ రాసి ఉంది.
ఈ జెండా రూపకల్పన సాధారణ సేవా సంఘాల కంటే పక్కా పొలిటికల్ పార్టీ జెండాను పోలి ఉండటంతో రాజకీయ విశ్లేషకులు దీనిని డి-కోడ్ చేయడం ప్రారంభించారు. మాస్ లీడర్గా ధనుష్ను ప్రజల్లోకి తీసుకెళ్లడానికే ఈ వ్యూహమని కొందరు అంచనా వేస్తున్నారు.
హిస్టరీ రిపీట్ అవుతుందా?
తమిళనాడు రాజకీయాలకు, సినిమా రంగానికి దశాబ్దాలుగా విడదీయరాని బంధం ఉంది.గతంలో ఎంజీఆర్, జయలలిత, కరుణానిధి, విజయ్ కాంత్ వంటి వారు సినిమా గ్లామర్, అపారమైన ఫ్యాన్ బేస్తోనే పాలిటిక్స్లోకి ఎంట్రీ ఇచ్చి సంచలనాలు సృష్టించారు.
ఇటీవలే దళపతి విజయ్ (TVK పార్టీ) కూడా పూర్తిస్థాయి రాజకీయాల్లోకి అడుగుపెట్టిన నేపథ్యంలో, ఇప్పుడు ధనుష్ ఫ్యాన్స్ క్లబ్ నెట్వర్క్ కూడా అదే దారిలో నడుస్తోందా అన్న అనుమానాలు బలపడుతున్నాయి.
ఇటీవల ధనుష్ తండ్రి, దర్శకుడు కస్తూరి రాజా పొలిటికల్ ఎంట్రీపై స్పందిస్తూ.. “రాజకీయాల్లోకి రావడం అనేది వ్యక్తిగత ఇష్టం. నా కొడుకులే కాదు, భవిష్యత్తులో మనవళ్లు వచ్చినా తప్పులేదు” అని వ్యాఖ్యానించడం విశేషం.
సేవా కార్యక్రమాల కోసమేనా?
ప్రస్తుతానికి ఈ హడావిడి అంతా అభిమాన సంఘం స్థాయిలోనే జరుగుతోంది. ఈ జెండా నీడన తమిళనాడుతో పాటు దేశవ్యాప్తంగా రక్తాదానం, విద్యా సహాయం, వైద్య శిబిరాలు, నిరుపేదలకు సహాయం వంటి విస్తృత సామాజిక సేవా కార్యక్రమాలు (Welfare Activities) చేపట్టాలని ఫ్యాన్ క్లబ్ పిలుపునిచ్చింది.
దీనిపై అటు ధనుష్ గానీ, ఆయన పీఆర్ టీమ్ గానీ ఎలాంటి పొలిటికల్ ప్రకటన చేయలేదు. వరుస క్రేజీ ప్రాజెక్టులతో బిజీగా ఉన్న ధనుష్ కేవలం అభిమానుల గుర్తింపు కోసమే ఈ జెండాను అనుమతించారా, లేక దీని వెనుక లాంగ్ టర్మ్ పొలిటికల్ స్కెచ్ ఉందా అనేది కాలమే నిర్ణయించాలి.
