Brazil Couple Sets Guinness World Record With Most Kisses | ప్రేమకు హద్దులు లేవంటారు.. కానీ ఇక్కడొక జంట తమ ప్రేమకు వేగాన్ని జోడించి ఏకంగా ప్రపంచ రికార్డునే సృష్టించింది.
కేవలం 30 సెకన్ల (అర నిమిషం) వ్యవధిలో దాదాపు రెండు వందల ముద్దులతో అల్లాడించి గిన్నిస్ వరల్డ్ రికార్డ్స్ (Guinness World Records) టైటిల్‌ను కైవసం చేసుకుంది.
అంతర్జాతీయ ముద్దుల దినోత్సవం (International Kissing Day) నాడే ఈ రికార్డు అధికారికంగా నమోదు కావడం విశేషం.
క్షణాల వ్యవధిలో ‘ముద్దుల’ వర్షం..
గిన్నిస్ వరల్డ్ రికార్డ్స్ నివేదిక ప్రకారం.. బ్రెజిల్‌కు చెందిన రెనాటో బేమా గైయా (32), అతని ప్రియురాలు నయారా రాబర్టా రిబీరో డి మారిన్స్ (33) ఈ సరికొత్త రికార్డును నెలకొల్పారు.
నిర్దేశిత 30 సెకన్ల సమయంలో ఈ జంట ఏకధాటిగా 195 ముద్దులు పెట్టుకుని అత్యధిక ముద్దుల రికార్డును తమ పేరిట లిఖించుకున్నారు.
వృత్తిరీత్యా వైద్యులైన ఈ ఇద్దరూ గత ఏడాదిన్నర కాలంగా రిలేషన్‌షిప్‌లో ఉన్నారు. ఘోరమైన కరోనావైరస్ మహమ్మారి సమయంలో ప్రాణాలకు తెగించి ఫ్రంట్‌లైన్ వారియ‌ర్స్‌గా సేవలందించిన ఈ డాక్టర్ల జంట, ఇప్పుడు ఈ వినూత్న రికార్డుతో వార్తల్లో నిలిచింది.
గిన్నిస్ సంస్థ విడుదల చేసిన వీడియోలో.. రెనాటో తన అభిమాన ఫుట్‌బాల్ క్లబ్ ‘సో జోస్ ఇ.సి.’ జెర్సీని ధరించి, నవ్వుతూ ఉన్న నయారా చెంపలపై మెరుపు వేగంతో ముద్దులు పెడుతూ కనిపించాడు.
తాము ‘ప్రపంచంలోనే బెస్ట్ కపుల్’ అని నమ్ముతున్నామని, అందుకే ఈ మధుర క్షణాన్ని ఒక టీమ్‌గా సాధించాలనుకున్నామని ఆ జంట సంతోషంగా తెలిపింది.
రికార్డుల వేటగాడు.. ఏడీహెచ్‌డీని జయించి..
ఈ రికార్డు వెనుక ఉన్న రెనాటో సామాన్యుడు కాదు. టైక్వాండోలో బ్లాక్ బెల్ట్ సాధించిన అతను తనను తాను “గెలుపుకు బానిస” అని చెప్పుకుంటాడు. అత్యధిక ప్రపంచ రికార్డులు సాధించిన బ్రెజిలియన్‌గా నిలవాలన్నది అతని పట్టుదల.
గతంలో అతను అతి తక్కువ సమయంలో 10 పుస్తకాలను అమర్చి పడగొట్టడం, అలాగే ‘అతిపెద్ద పాద భ్రమణం (పురుషుల విభాగం)’ వంటి వింత రికార్డులను కూడా సాధించాడు. తన సక్సెస్ జర్నీలో ప్రియురాలి పేరు కూడా ఉండాలనే ఈ ముద్దుల ఛాలెంజ్ ఎంచుకున్నాడు.
“నేను ఒక ఎముక మజ్జ దాతను (Bone Marrow Donor). అంతేకాదు నాకు ఏడీహెచ్‌డీ ఉంది. ఏడీహెచ్‌డీ ఉన్నంత మాత్రాన వెనకబడిపోనక్కర్లేదు, అనుకుంటే ఏదైనా సాధించగలరని నిరూపించడానికే నేనీ ప్రయత్నాలన్నీ చేస్తున్నా.” అని రెనాటో బేమా గైయా తెలిపారు.
తదుపరి టార్గెట్.. జపాన్ రికార్డు బ్రేక్ చేయడం..
ఈ జోడీ ఇక్కడితో ఆగడం లేదు. తమ తదుపరి లక్ష్యాన్ని అప్పుడే ప్రకటించేసింది. ‘ఒక నిమిషంలో ఒక జంట ఇచ్చే అత్యధిక ముద్దుల’ రికార్డుపై వీరు కన్నేశారు.
ప్రస్తుతం ఈ రికార్డు 277 ముద్దులతో జపాన్‌కు చెందిన ప్రసిద్ధ చెర్రీ యోషితాకే (మిస్టర్ చెర్రీ), కుమికో షిరటోరిల పేరిట ఉంది. త్వరలోనే దీన్ని కూడా బద్దలు కొడతామని బ్రెజిల్ జంట ధీమా వ్యక్తం చేస్తోంది.
