Nandan Nilekani Exam Reforms AI Question Paper దేశంలో వరుస ప్రశ్నాపత్రాల లీకేజీలు, పరీక్షల అక్రమాలకు స్వస్తి పలికేందుకు సాంకేతిక పరిజ్ఞానాన్ని పూర్తిస్థాయిలో వినియోగించుకోవాల్సిన అవసరం ఉందని పరీక్షల సంస్కరణల కమిటీ (High-Powered Task Force on Exam Reforms) అధిపతి, ఇన్ఫోసిస్ సహ వ్యవస్థాపకుడు నందన్ నీలేకణి (Nandan Nilekani) స్పష్టం చేశారు.
ఢిల్లీలో జరిగిన ‘బ్లూమ్‌బెర్గ్ న్యూ ఎకానమీ ఫోరమ్ 2026’ (Bloomberg New Economy Forum 2026) సదస్సులో మాట్లాడిన ఆయన, ప్రశ్నాపత్రాల లీకేజీల సమస్యకు సాంకేతిక పరిష్కారాలు సాధ్యమేనని ధీమా వ్యక్తం చేశారు. నీలేకణి నేతృత్వంలోని ఈ ఉన్నత స్థాయి టాస్క్‌ఫోర్స్ ప్రతిపాదించే సిఫార్సులను అమలు చేసేందుకు ప్రధాని నరేంద్ర మోదీ ఎంతో ఆసక్తిగా ఉన్నారని ఆయన వెల్లడించారు.
చివరి నిమిషంలో AI ద్వారా ప్రశ్నాపత్రం..
అసలు ‘ప్రశ్నాపత్రం’ (Question Paper) ముందే తయారై ఉండటం వల్లే దానిని అమ్ముకోవాలనే ఆర్థిక ప్రలోభాలు (Economic Incentive) ఏర్పడుతున్నాయని నీలేకణి విశ్లేషించారు. దీనికి పరిష్కారంగా ఒక భారీ ‘క్వశ్చన్ బ్యాంక్’ (Question Bank) ను ఏర్పాటు చేసి, కృత్రిమ మేధ (AI) సాంకేతికత సాయంతో పరీక్ష రోజున చివరి నిమిషంలో రసీదు లేదా ప్రశ్నాపత్రాన్ని ఆటోమేటిక్‌గా జనరేట్ చేసే విధానాన్ని తీసుకురావాలని సూచించారు.
కంప్యూటర్ ఆధారిత పరీక్షలు (CBT)..
దేశవ్యాప్తంగా అన్ని రకాల పోటీ పరీక్షలను కంప్యూటర్ ఆధారిత విధానంలో (Computer-Based Testing) నిర్వహించాలని తెలిపారు. ప్రస్తుతం దేశంలో విద్యార్థులు CBT పరీక్షలు రాసేందుకు సుమారు 1.5 లక్షల కేంద్రాలు ఉన్నాయని, ఈ నెట్‌వర్క్‌ను మరింత విస్తరించాల్సిన అవసరం ఉందన్నారు. ఆధార్ రూపురేఖలు దిద్దిన UIDAI వ్యవస్థాపక ఛైర్మన్‌గా తన అనుభవాన్ని గుర్తుచేసుకుంటూ.. సాంకేతికతను భారీ స్థాయిలో వినియోగించినప్పుడు ప్రజలందరికీ ప్రయోజనం చేకూరేలా (Win-Win situation) చూడటమే తన ప్రాధాన్యత అని పేర్కొన్నారు.
ఈ ఏడాది మే నెలలో NEET-UG ప్రశ్నాపత్రం లీక్ కావడం, తత్ఫలితంగా పరీక్ష రద్దు, దేశవ్యాప్తంగా విద్యార్థుల నిరసనలు మరియు అప్పటి కేంద్ర విద్యాశాఖ మంత్రి ధర్మేంద్ర ప్రధాన్ రాజీనామాకు దారితీసిన సంగతి తెలిసిందే. ఈ ఘటనల నేపథ్యంలో పరీక్షా విధానంలో సమూల మార్పులు తెచ్చేందుకు కేంద్ర ప్రభుత్వం జూలై 2026లో నందన్ నీలేకణి అధ్యక్షతన ఈ హై-పవర్డ్ టాస్క్‌ఫోర్స్‌ను ఏర్పాటు చేసింది.
