New Adhaar App | ఆధార్ (Aadhaar)తో లింక్ చేసిన మొబైల్ నంబర్ అప్డేట్ చేయడానికి కేంద్రాన్ని సందర్శించలేక ఇబ్బంది పడుతున్నారా? పాత నంబర్ యాక్టివ్ లేక చిక్కుల్లో ఉన్నారా? లేదా చిరునామా వంటి ఇతర ఆధార్ వివరాలను మార్చుకోవాలనుకుంటున్నారా? ఈ సమస్యలన్నింటికీ ఒకే పరిష్కారంగా కేంద్ర ప్రభుత్వం కొత్త ఆధార్ యాప్ను రూపొందించింది.
డిజిటల్ గుర్తింపు నిర్వహణను మరింత సులభం, సురక్షితం మరియు సౌకర్యవంతంగా చేయాలనే లక్ష్యంతో UIDAI (యూనిక్ ఐడెంటిఫికేషన్ అథారిటీ ఆఫ్ ఇండియా) ఈ యాప్ను తీసుకొచ్చింది.
కొత్త ఆధార్ యాప్ ప్రత్యేకతలు ఇవీ..
కొత్త ఆధార్ యాప్ ద్వారా ఇకపై ఫోటోకాపీలు తీసుకెళ్లాల్సిన అవసరం లేకుండా ఆధార్ ధృవీకరణ చేసుకోవచ్చు. హోటల్ చెక్-ఇన్లు, సిమ్ కార్డు కొనుగోలు, ఆఫీస్ వెరిఫికేషన్ వంటి సందర్భాల్లో ఆధార్ కాపీలు పంచుకోవడం వల్ల డేటా దుర్వినియోగం జరుగుతోందని UIDAI గుర్తించింది.
ఈ సమస్యకు పరిష్కారంగా ఆఫ్లైన్ ఆధార్ వెరిఫికేషన్ను యాప్లో ప్రవేశపెట్టింది. ఇందులో ఆధార్ నంబర్ లేదా బయోమెట్రిక్ వివరాలు పంచుకోకుండానే గుర్తింపు నిర్ధారణ చేయవచ్చు.
ఆధార్ యాప్ను ఎలా డౌన్లోడ్ చేసుకోవాలి?
ఆండ్రాయిడ్ ఫోన్ వినియోగదారులు – గూగుల్ ప్లే స్టోర్ ద్వారా,
ఐ ఫోన్ వినియోగదారులు – ఆపిల్ యాప్ స్టోర్ ద్వారా ఈ యాప్ ను డౌన్ లోడ్ చేసుకోవచ్చు.
డౌన్లోడ్ విధానం: స్టోర్లో “Aadhaar” (UIDAI అధికారిక యాప్) కోసం సెర్చ్ చేయండి. యాప్ను డౌన్లోడ్ చేసి ఇన్స్టాల్ చేయండి. మీకు నచ్చిన భాషను ఎంచుకుని సెటప్ పూర్తి చేయండి. సెటప్ పూర్తైన తర్వాత ఆధార్ నిర్వహణ సేవలను ఉపయోగించుకోవచ్చు.
ఆఫ్లైన్ ఆధార్ ధృవీకరణ ఎలా పనిచేస్తుంది?
ఇంటర్నెట్ లేకుండానే ఆధార్ వెరిఫికేషన్ చేసుకునే అవకాశం ఈ యాప్ అందిస్తుంది.
ఇందుకు రెండు మార్గాలు ఉన్నాయి:
1. షేర్ ఐడి (Share ID): పాస్వర్డ్ రక్షిత ఆధార్ ఫైల్ రూపొందించి, అవసరమైన వివరాలు (పేరు, వయస్సు వంటి వాటి) మాత్రమే పంచుకోవచ్చు.
2. QR కోడ్ స్కానింగ్: ధృవీకరించే సంస్థ చూపే QR కోడ్ను స్కాన్ చేస్తే వెంటనే ఆధార్ వెరిఫికేషన్ పూర్తవుతుంది. మొబైల్ నంబర్, చిరునామా అప్డేట్ ఎలా చేయాలి?
ఆధార్ యాప్ ఓపెన్ చేసి ఆధార్ ఆధారిత ప్రామాణీకరణతో లాగిన్ అవ్వాలి.
‘ఆధార్ వివరాలను నవీకరించు’ ఎంపికపై క్లిక్ చేయాలి.
మొబైల్ నంబర్ లేదా చిరునామా అప్డేట్ ఎంపిక చేసుకోవాలి.
కొత్త వివరాలు నమోదు చేసి అభ్యర్థన పంపాలి
ప్రామాణీకరణ పూర్తిచేసి స్వల్ప రుసుము చెల్లించాలి.
వెరిఫికేషన్ పూర్తయిన తర్వాత ఆధార్ రికార్డుల్లో మార్పులు అమలవుతాయి.
ఆధార్ యాప్లోని ఇతర ముఖ్య ఫీచర్లు ఐదు ఆధార్ ప్రొఫైల్లు:
ఒకే ఫోన్లో పిల్లలు లేదా కుటుంబ సభ్యుల ఆధార్ వివరాలు నిర్వహించుకోవచ్చు
ఆధార్ కాంటాక్ట్ కార్డ్: పూర్తి సమాచారం చూపించకుండా అవసరమైన వివరాలు మాత్రమే సురక్షితంగా షేర్ చేయవచ్చు
ఆఫ్లైన్ ఆధార్ ఉపయోగించే సంస్థలకు కొత్త నిబంధన
ఆఫ్లైన్ ఆధార్ వెరిఫికేషన్ ఉపయోగించాలంటే సంస్థలు తప్పనిసరిగా UIDAI వద్ద నమోదు చేసుకోవాలని కేంద్రం స్పష్టం చేసింది. ఈ నిబంధన ద్వారా దుర్వినియోగాన్ని అరికట్టడంతో పాటు బ్యాంకులు, హోటళ్లు, సేవా సంస్థలు వంటి అధీకృత సంస్థలకే ఈ సౌకర్యం పరిమితం చేయనున్నారు.
మొత్తంగా, కొత్త ఆధార్ యాప్తో భౌతిక ఆధార్ కాపీల అవసరం తగ్గి, డిజిటల్ ఆధార్ వినియోగం మరింత సురక్షితంగా మారనుంది.
