Rahul Ramakrishna Post టాలీవుడ్ విలక్షణ నటుడు, రచయిత రాహుల్ రామకృష్ణ ఎక్స్ (ట్విట్టర్) వేదికగా చేసిన ఒక పొలిటికల్ పోస్ట్ సోషల్ మీడియాలో తీవ్ర దుమారం రేపుతోంది. తన రాజకీయ, సామాజిక అభిప్రాయాలను నిర్భయంగా బయటపెట్టే ఆయన… తాజాగా “చితి చివరిదాంక… కేసీఆర్!” అని పోస్ట్ చేయడంతో ఈ వ్యవహారం రాజకీయంగా, సినీ వర్గాల్లో సంచలనంగా మారింది.
నేపథ్యంపై సందేహాలు.. నెటిజన్ల భిన్నాభిప్రాయాలు..
ఈ పోస్ట్ను ఏ సందర్భాన్ని పురస్కరించుకుని చేశారనే దానిపై స్పష్టమైన ఆధారాలు లేకపోయినప్పటికీ, నెటిజన్ల నుంచి భిన్నమైన స్పందనలు వ్యక్తమవుతున్నాయి. బిఆర్ఎస్ (BRS) మద్దతుదారులు, కేసీఆర్ అభిమానులు ఈ పోస్టును రీట్వీట్ చేస్తూ రాహుల్ రామకృష్ణకు మద్దతు తెలుపుతున్నారు. మరోవైపు, మరికొందరు నెటిజన్లు ఆయన రాజకీయ వైఖరిని తీవ్రంగా తప్పుబడుతూ విమర్శలు గుప్పిస్తున్నారు.
గతంలోనూ పలు వివాదాస్పద వ్యాఖ్యలు..
రాహుల్ రామకృష్ణ రాజకీయ అంశాలపై స్పందించడం లేదా వివాదాల్లో చిక్కుకోవడం ఇదే మొదటిసారి కాదు. గతంలో ఆంధ్రప్రదేశ్ డిప్యూటీ సీఎం పవన్ కల్యాణ్ను ఉద్దేశించి చేసిన వ్యాఖ్యల వల్ల జనసైనికుల (జనసేన మద్దతుదారుల) నుంచి ఆయన తీవ్ర స్థాయిలో ట్రోలింగ్ను ఎదుర్కొన్నారు. తెలంగాణలోని తాజా రాజకీయ పరిస్థితులపై కేసీఆర్, కేటీఆర్లను ట్యాగ్ చేస్తూ ఆయన చేసిన పలు ట్వీట్లు కూడా గతంలో సంచలనం సృష్టించాయి.
‘అర్జున్ రెడ్డి’, ‘గీత గోవిందం’, ‘బ్రోచేవారెవరురా’, ‘జాతి రత్నాలు’, ‘ఆర్ఆర్ఆర్’, ‘ఓం భీమ్ బుష్’ వంటి సూపర్హిట్ చిత్రాల్లో తన ప్రత్యేకమైన కామెడీ, నటనతో అలరించిన ఆయన, కేవలం నటుడిగానే కాకుండా రచయితగా కూడా మంచి గుర్తింపు తెచ్చుకున్నారు.
