ఓటర్ల జాబితాలో పేరు లేనంత మాత్రాన పౌరసత్వం పోదు!

• ‘ఆధార్’ పౌరసత్వానికి రుజువు కాదు!
• సుప్రీంకోర్టు సంచలన తీర్పు..

Supreme Court verdict on ECI SIR Process | దేశంలో ఓటర్ల జాబితా సవరణ, పౌరసత్వ వివాదంపై సుప్రీంకోర్టు బుధవారం ఒక చారిత్రాత్మక తీర్పును వెలువరించింది. ఎన్నికల సంఘం (ECI) చేపట్టిన ‘స్పెషల్ ఇంటెన్సివ్ రివిజన్’ (SIR) ప్రక్రియ యొక్క చట్టబద్ధతను సర్వోన్నత న్యాయస్థానం సర్వత్రా సమర్థించింది.

అయితే, ఈ ప్రక్రియ కింద ఓటర్ల జాబితా నుండి ఎవరి పేరైనా తొలగించబడితే.. అది వారి పౌరసత్వాన్ని నిర్ధారించదని కోర్టు స్పష్టం చేసింది.

చీఫ్ జస్టిస్ సూర్యకాంత్, జస్టిస్ జాయ్‌మల్య బాగ్చీలతో కూడిన ధర్మాసనం ఈ కీలక తీర్పును ఇస్తూ.. ఎన్నికల సంఘం జరిపే విచారణ కేవలం ఎన్నికల్లో ఓటు వేసే అర్హతకు మాత్రమే పరిమితమని వ్యాఖ్యానించింది. అది పౌరసత్వ నిర్ధారణ పరీక్ష కాదని తేల్చి చెప్పింది.

బ్యాక్‌డోర్ పౌరసత్వ పరీక్ష కాదు..
ఎన్నికల సంఘం నడుపుతున్న ‘ఎస్ఐఆర్’ (SIR) వ్యాయామం వెనుకదారిలో పౌరసత్వాన్ని వెరిఫై చేసే ప్రక్రియేనని ప్రతిపక్షాలు, పిటిషనర్లు వాదించగా, కోర్టు ఆ వాదనను తోసిపుచ్చింది.

“ఓటర్ల జాబితా నుండి పేర్లను తొలగించే అధికారం కమిషన్‌కు ఉంది. అంతమాత్రాన సదరు వ్యక్తి భారత పౌరుడు కాదని అర్థం కాదు. పౌరసత్వ నిర్ధారణకు, దీనికి ఎలాంటి సంబంధం లేదు” అని ధర్మాసనం పేర్కొంది.

అర్హత కోసమే విచారణ..
ఓటర్ల జాబితాలో చేర్చడానికి లేదా మినహాయించడానికి మాత్రమే ఈ ఈసీఐ విచారణ పరిమితమని, ఇది పౌరసత్వాన్ని హరించేలా ఉండదని సీజేఐ స్పష్టం చేశారు.

పౌరసత్వానికి అసలైన రుజువులు ఇవే..
గత ఏడాది జూన్‌లో ఎన్నికల సంఘం మొదట బీహార్‌లో ఈ ప్రత్యేక ఓటర్ల జాబితా సవరణ (SIR) ప్రక్రియను ప్రారంభించింది. ఆ తర్వాత దీనిని పశ్చిమ బెంగాల్, కేరళ, తమిళనాడు సహా పలు రాష్ట్రాలకు విస్తరించింది.

ప్రస్తుతం 16 రాష్ట్రాలు, 3 కేంద్రపాలిత ప్రాంతాలలో దీని చివరి దశ నడుస్తోంది. 2002/2003 ఓటర్ల జాబితాలో పేర్లు లేని ఓటర్లు, తమ పూర్వీకుల లింకేజీని నిరూపించుకోవాలనే నిబంధన పెట్టడంపై తీవ్ర అభ్యంతరాలు వ్యక్తమయ్యాయి.

పౌరసత్వ నిరూపణకు ఏది ప్రామాణికం..
ఈ తీర్పు నేపథ్యంలో ‘భారత పౌరసత్వానికి అసలైన ఆధారాలు ఏవి?’ అనే పెద్ద ప్రశ్న తెరపైకి వచ్చింది. ఎందుకంటే.. ఆధార్ కార్డు (Aadhaar Card) అనేది పౌరసత్వానికి రుజువు కాదని సుప్రీంకోర్టు, ఎన్నికల సంఘం గతంలోనే స్పష్టం చేశాయి.

ఎస్ఐఆర్ (SIR) ప్రక్రియలో పౌరసత్వ ధృవీకరణ కోసం కింది పత్రాలను మాత్రమే ప్రామాణికంగా అంగీకరిస్తున్నారు.

మున్సిపల్ లేదా ప్రభుత్వ యంత్రాంగం జారీ చేసిన జనన ధృవీకరణ పత్రం (Birth Certificate)
జిల్లా మేజిస్ట్రేట్ (DM) జారీ చేసిన స్థానికత ధృవీకరణ పత్రం (Domicile Certificate)
పాస్‌పోర్ట్ (Passport),
పాఠశాల రికార్డులు (School Records),
భూమి రికార్డులు (Land Records)

ఆ పేర్లన్నీ హోంశాఖకు పంపండి: సుప్రీంకోర్టు ఆదేశం
అనుమానాస్పద పౌరసత్వం కారణంగా ఓటర్ల జాబితా నుండి తొలగించబడిన వ్యక్తుల వివరాలన్నింటినీ 4 వారాల లోపు కేంద్ర హోంమంత్రిత్వ శాఖకు (MHA) పంపాలని సుప్రీంకోర్టు ఎన్నికల సంఘాన్ని ఆదేశించింది.

పౌరసత్వ చట్టం, 1955 ప్రకారం వారి పౌరసత్వ క్లెయిమ్‌లను హోంశాఖే నిర్ధారించాల్సి ఉంటుందని స్పష్టం చేసింది.

తదుపరి అసెంబ్లీ లేదా స్థానిక సంస్థల ఎన్నికల కంటే ముందే ఈ వెరిఫికేషన్ ప్రక్రియను పూర్తి చేయాలని, సదరు వ్యక్తులకు నోటీసులు ఇచ్చి వారి వాదనలు వినాలని కోర్టు పేర్కొంది.

ఒకవేళ కేంద్ర హోంశాఖ విచారణలో వారు భారత పౌరులని తేలితే.. తక్షణమే వారి పేర్లను ఓటర్ల జాబితాలో పునరుద్ధరించాలని సుప్రీంకోర్టు ఆదేశించింది.