Revanth Reddy photo in KCR Office | మాజీ ముఖ్యమంత్రి కేసీఆర్ (KCR)ప్రాతినిధ్యం వహిస్తున్న గజ్వేల్ నియోజకవర్గంలో శనివారం మధ్యాహ్నం ఒక్కసారిగా రాజకీయ వేడి రాజుకుంది.
ఎమ్మెల్యే క్యాంప్ కార్యాలయం వద్ద కాంగ్రెస్ మరియు బీఆర్ఎస్ శ్రేణుల మధ్య నెలకొన్న వివాదంతో హై టెన్షన్ వాతావరణం చోటుచేసుకుంది.
భారీ సంఖ్యలో తరలివచ్చిన కాంగ్రెస్ కార్యకర్తలు, ముఖ్యమంత్రి రేవంత్ రెడ్డి ఫోటోను చేతబూని కేసీఆర్ కార్యాలయంలోకి దూసుకెళ్లారు.
లోపలికి వెళ్లిన అనంతరం అక్కడ సీఎం ఫోటోను ఉంచి, ప్రభుత్వానికి అనుకూలంగా పెద్ద ఎత్తున నినాదాలు చేశారు. ఈ అనూహ్య పరిణామంతో స్థానికంగా కలకలం రేగింది.
ఈ క్రమంలో క్యాంప్ కార్యాలయానికి చెందిన కిటికీ అద్దాలు, ఫర్నీచర్ ధ్వంసమయ్యాయి. కాంగ్రెస్ కార్యకర్తలు కావాలనే కార్యాలయంపై దాడికి దిగి ఆస్తులను ధ్వంసం చేశారని బీఆర్ఎస్ నేతలు తీవ్రస్థాయిలో మండిపడుతున్నారు.
ఇది ప్రజాస్వామ్య విరుద్ధమని, విపక్ష నేత కార్యాలయంపై భౌతిక దాడులకు దిగడం హేయమైన చర్య అని వారు విమర్శిస్తున్నారు.
అయితే, తాము కేవలం శాంతియుతంగా కార్యాలయంలోకి వెళ్లామని, ఎటువంటి దాడులకు పాల్పడలేదని కాంగ్రెస్ నాయకులు వాదిస్తున్నారు. రేవంత్ రెడ్డి ఫోటోను అక్కడ ఉంచడం ద్వారా తమ నిరసనను తెలియజేశామని వారు పేర్కొన్నారు.
ప్రస్తుతం గజ్వేల్లో ఉద్రిక్త పరిస్థితులు కొనసాగుతున్నాయి. సమాచారం అందుకున్న పోలీసులు ఘటనా స్థలానికి చేరుకుని పరిస్థితిని అదుపులోకి తెచ్చే ప్రయత్నం చేస్తున్నారు. ఎటువంటి అవాంఛనీయ సంఘటనలు జరగకుండా భారీగా పోలీసు బలగాలను మోహరించారు.
నియోజకవర్గ వ్యాప్తంగా ఇరు పార్టీల నాయకులు పరస్పర ఆరోపణలు చేసుకుంటుండటంతో రాజకీయ వాతావరణం మరింత వేడెక్కింది. పోలీసులు ఈ ఘటనపై కేసు నమోదు చేసి దర్యాప్తు ప్రారంభించారు.
