భర్త సిరల్లోకి టాయిలెట్ క్లీనర్ ఎక్కించి హతమార్చిన భార్య! -

నిజామాబాద్‌లో వివాహేతర సంబంధం ఉన్మాదం!

Nizamabad Nurse Kills Husband | తెలంగాణలోని నిజామాబాద్ జిల్లాలో నమ్మశక్యం కాని రీతిలో ఒక దిగ్భ్రాంతికరమైన దారుణ హత్య ఉదంతం వెలుగుచూసింది. వివాహేతర సంబంధానికి అడ్డంకిగా ఉన్నాడని, కంటికి రెప్పలా కాపాడాల్సిన భర్తను ఒక నర్సు తన ప్రియుడితో కలిసి అత్యంత క్రూరంగా హతమార్చింది.

గతంలో జరిగిన హత్యాయత్నం నుండి తీవ్ర గాయాలతో బయటపడి ఇంట్లో చికిత్స పొందుతున్న భర్త సిరల్లోకి (Veins) కాన్యులా ద్వారా నేరుగా టాయిలెట్ క్లీనర్‌ను, నిద్రమాత్రల విష మిశ్రమాన్ని ఎక్కించి ప్రాణాలు తీసింది.

వివాహేతర సంబంధమే కారణం..

పోలీసుల దర్యాప్తులో తేలిన వివరాల ప్రకారం.. మృతుడు దాయినీ ప్రశాంత్ (35) గత రెండేళ్లుగా గల్ఫ్ దేశంలో పనిచేస్తూ, జూన్ 27న తిరిగి స్వగ్రామానికి వచ్చాడు. ఇకపై విదేశాలకు వెళ్లకుండా ఇక్కడే ఉండాలని ప్రశాంత్ నిర్ణయించుకున్నాడు.

అయితే ప్రశాంత్ భార్య సంధ్య (32) కు అనిల్ (35) అనే వ్యక్తితో వివాహేతర సంబంధం ఉంది. భర్త శాశ్వతంగా ఇక్కడే ఉండిపోతే తమ బంధానికి అడ్డు వస్తాడని భావించిన సంధ్య, అతడిని వదిలించుకోవాలని డిసైడ్ అయింది.

మొదటి హత్యాయత్నం విఫలం..

ఒక ప్రైవేట్ ఆసుపత్రిలో నర్సుగా పనిచేసే సంధ్య, తన ప్రియుడు అనిల్, అతని స్నేహితుడు వెంకట్ సాయి అలియాస్ బంటీలతో కలిసి భర్తను చంపేందుకు ప్లాన్ వేసింది. ఇందులో భాగంగా జూన్ 29న సాయి ప్రశాంత్‌కు అమితంగా మద్యం తాగించి, భవనం టెర్రస్ పైకి తీసుకెళ్లి కిందకు తోసేశాడు. కానీ ప్రశాంత్ తీవ్ర గాయాలతో ప్రాణాలతో బయటపడ్డాడు.

మద్యం మత్తులో ప్రమాదవశాత్తు కిందపడ్డావని నమ్మించి, అతడిని ప్రభుత్వ, ఆపై ప్రైవేట్ ఆసుపత్రులకు తీసుకెళ్లి చికిత్స చేయించి ఇంటికి తీసుకువచ్చారు.

కాన్యులా ద్వారా సిరల్లోకి విషం..

మొదటి ప్లాన్ విఫలమవడంతో సంధ్య తన నర్సింగ్ వృత్తి నైపుణ్యాన్ని భర్తను చంపడానికి ఆయుధంగా వాడుకుంది. ప్రశాంత్ గాయాలపాలవడంతో ఇంట్లోనే ఐవీ ఫ్లూయిడ్స్ (సెలైన్) ఇచ్చేందుకు కాన్యులా ఏర్పాటు చేసింది.

ఆ ముగ్గురి కుట్ర ప్రకారం.. సంధ్య ఆ కాన్యులా ద్వారా నేరుగా ప్రశాంత్ సిరల్లోకి టాయిలెట్ క్లీనింగ్ ద్రవాన్ని (Toilet Cleaner), నలిపిన నిద్రమాత్రల ప్రాణాంతక విషపూరిత మిశ్రమాన్ని ఇంజెక్ట్ చేసింది. ఆ తర్వాత జూన్ 30న అతడిని మంచం పైనుంచి కిందకు తోసివేయడంతో ప్రశాంత్ అక్కడికక్కడే మరణించాడు.

టెర్రస్ పైనుంచి పడటం వల్ల తగిలిన గాయాల వల్లే ఆరోగ్యం క్షీణించి చనిపోయాడని అందరినీ నమ్మించేందుకు ఆమె డ్రామా ఆడింది.

తల్లి ఫిర్యాదుతో కేసు ఛేదించిన పోలీసులు..

విడిగా నివసిస్తున్న ప్రశాంత్ తల్లికి కుమారుడి మరణంపై తీవ్ర అనుమానం వచ్చింది. తన కుమారుడు గల్ఫ్ నుండి ఇంటికి వచ్చిన విషయం కానీ, మరణానికి ముందు జరిగిన ఘోరాల గురించి కానీ తనకు సంధ్య చెప్పకపోవడంతో ఆమె పోలీసులకు ఫిర్యాదు చేసింది.

రంగంలోకి దిగిన పోలీసులు టెక్నికల్ మరియు క్షుణ్ణమైన దర్యాప్తు జరిపి సంధ్య గుట్టురట్టు చేశారు. నిందితులు ముగ్గురిని (సంధ్య, అనిల్, సాయి) పోలీసులు అరెస్ట్ చేసి కోర్టులో హాజరుపరచగా, న్యాయస్థానం వారికి జ్యుడీషియల్ కస్టడీ విధించింది.