ఈ బంధం ఎన్నటికీ మరవలేం.. ఇండియాకు ఇరాన్ థ్యాంక్స్! -

Iran Thanks India | ఇటీవల అమెరికా-ఇజ్రాయెల్ వైమానిక దాడులలో మరణించిన ఇరాన్ సుప్రీం లీడర్, అయతొల్లా సయ్యద్ అలీ ఖమేనీ (Ayatollah Seyyed Ali Khamenei) అంత్యక్రియల కార్యక్రమాల్లో భారతదేశం అధికారికంగా పాల్గొనడంపై ఇరాన్ ప్రభుత్వం అపారమైన కృతజ్ఞతలను, ప్రశంసలను తెలియజేసింది.

భారత ప్రతినిధుల హాజరు ఇరు దేశాల మధ్య ఉన్న పరస్పర గౌరవానికి, శతాబ్దాల నాటి సాంస్కృతిక బంధానికి శక్తివంతమైన నిదర్శనమని భారతదేశంలోని ఇస్లామిక్ రిపబ్లిక్ ఆఫ్ ఇరాన్ రాయబార కార్యాలయం (Embassy of Iran) ప్రత్యేకంగా కొనియాడింది.

నివాళులర్పించిన భారత అధికారిక బృందం..

అమెరికా-ఇజ్రాయెల్ దాడుల కారణంగా టెహ్రాన్‌లో మరణించిన ఖమేనీకి నివాళులర్పించేందుకు భారత్ తరఫున ఒక ఉన్నత స్థాయి ప్రతినిధి బృందం ఇరాన్ వెళ్ళింది.

బీహార్ గవర్నర్ లెఫ్టినెంట్ జనరల్ (రిటైర్డ్) సయ్యద్ అత హస్నైన్, కేంద్ర విదేశాంగ శాఖ సహాయ మంత్రి పవిత్ర మార్గరీటా (Pavitra Margherita) లతో కూడిన అధికారిక బృందం శుక్రవారం నాడు దివంగత ఇరాన్ సుప్రీం లీడర్‌కు ఘన నివాళులర్పించింది.

కేవలం ప్రభుత్వ ప్రతినిధులే కాకుండా, కాంగ్రెస్ సీనియర్ నేత సల్మాన్ ఖుర్షీద్, జమ్మూ కాశ్మీర్ మాజీ ముఖ్యమంత్రి మెహబూబా ముఫ్తీలతో పాటు భారతదేశానికి చెందిన సిక్కు, హిందూ, ముస్లిం, క్రైస్తవ మత పెద్దలు కూడా టెహ్రాన్ వెళ్లి నివాళులర్పించిన వారిలో ఉన్నారు.

ఇరాన్ రాయబార కార్యాలయం భావోద్వేగ పోస్ట్..

భారతదేశం చూపిన ఈ సంఘీభావంపై ఇరాన్ రాయబార కార్యాలయం ‘X’ (ట్విట్టర్) వేదికగా ఒక సుదీర్ఘమైన, హృదయపూర్వక కృతజ్ఞతా పత్రాన్ని పంచుకుంది.

“ఈ కష్టకాలంలో భారత ప్రభుత్వం, అక్కడి విభిన్న విశ్వాసాల ప్రజలు, రాజకీయ నాయకులు, మేధావులు చూపిన కరుణ, స్నేహపూర్వక హృదయపూర్వక గౌరవ సూచకాన్ని ఇరాన్ ప్రజలు ఎన్నటికీ మరచిపోరు.

ఈ గంభీరమైన హాజరు మన రెండు దేశాల మధ్య ఉన్న లోతైన చారిత్రక, సాంస్కృతిక మరియు మానవ బంధాలను ప్రతిబింబిస్తోంది. ఇరు దేశాల చిరకాల మైత్రిని మరింత బలోపేతం చేయడానికి ఇది ఒక బలమైన పునాది.” అంటూ ఇరాన్ రాయబార కార్యాలయం తన పోస్ట్ లో పేర్కొంది.

టెహ్రాన్ వీధుల్లో దేశ చరిత్రలోనే అతిపెద్ద జనసందోహం..

ఇరాన్ ప్రభుత్వ అధికారిక ప్రసార సంస్థ ‘ప్రెస్ టీవీ’ (Press TV) కథనం ప్రకారం.. అలీ ఖమేనీ అంత్యక్రియల ఊరేగింపు సోమవారం ఉదయం రాజధాని టెహ్రాన్‌లో అత్యంత భారీ ఎత్తున ప్రారంభమైంది. దేశ ఆధునిక చరిత్రలోనే ఇది అతిపెద్ద బహిరంగ జనసందోహంగా నిలిచింది.

ఖమేనీ మరియు ఆయన కుటుంబ సభ్యుల జెండా కప్పిన శవపేటికలను ఒక ప్రత్యేకంగా అలంకరించిన ట్రక్కుపై ఉంచారు. నల్లటి దుస్తులు ధరించిన లక్షలాది మంది సంతాపకుల మధ్య నుండి నెమ్మదిగా తరలించారు.

ప్రజలు ఆ శవపేటికలను తాకి ఆశీర్వాదం పొందడానికి పోటీ పడ్డారు. రివల్యూషనరీ గార్డ్ జనరల్ హసన్ హసన్జ్‌స్దేహ్ నేతృత్వంలో దాదాపు 10 నుండి 12 గంటల పాటు సాగిన ఈ ఊరేగింపు మెహ్రాబాద్ అంతర్జాతీయ విమానాశ్రయం వరకు కొనసాగింది.

శనివారం నుంచే ఇరాన్‌లో వీధులు, గగనతలాన్ని మూసివేసి జాతీయ సంతాప దినాలు ప్రకటిస్తూ జనజీవనాన్ని నిలిపివేశారు. 86 ఏళ్ల ఖమేనీ పార్థివ దేహాన్ని ఆయన జన్మస్థలమైన మషద్‌లోని ప్రసిద్ధ ఇమామ్ రెజా మందిరంలో ఖననం చేయడంతో ఈ అంత్యక్రియల ప్రక్రియ గురువారం ముగియనుంది.