H1B Visa Fee | అమెరికా (America)ప్రభుత్వం ఆ దేశంలో ఉద్యోగాల నిమిత్తం మంజూరు చేసే హెచ్ 1 బీ వీసా(H1B Visa)పై లక్ష డాలర్ల ఫీజు విధించిన విషయం తెలిసిందే. దీంతో హెచ్ 1 బీ ఫీజు నిబంధనపై ప్రపంచవ్యాప్తంగా గందరగోళం నెలకొంది.
అయితే ఈ గందరగోళానికి చెక్ పెడుతూ వైట్ హౌజ్ ఓ తాజా వివరణ ఇచ్చింది. హెచ్1 బీ వీసా ఫీజు పెంపు కొత్తగా దరఖాస్తు చేసుకునే వారికి మాత్రమే వర్తిస్తుందని స్పష్టం చేసింది. అది కూడా కేవలం వన్ టైమ్ ఫీజు మాత్రమేనని, వార్షిక ఫీజు కాదని వెల్లడించింది.
ఈ మేరకు వైట్‌హౌస్‌ ప్రెస్‌ సెక్రటరీ కరోలిన్‌ లీవిట్‌ ‘ఎక్స్‌’ వేదికగా స్పష్టతనిచ్చారు. ఇప్పటికే హెచ్ 1బీ వీసాపై అమెరికాలో పనిచేస్తున్న విదేశీయులకు ఈ ఫీజు పెంపు నిబంధన వర్తించదని తెలిపింది. హెచ్-1బీ వీసాపై విధించిన లక్ష డాలర్లు అనేది వార్షిక ఫీజు కాదని ఆమె స్పష్టం చేశారు.
కొత్తగా హెచ్ 1బీ వచ్చిన వారు దరఖాస్తు చేసుకునే సమయంలో కట్టాల్సిన వన్‌టైమ్‌ ఫీజు మాత్రమేనని చెప్పారు. ఇప్పటికే ఈ వీసా కలిగి ఉండి అమెరికా బయట ఉన్నవారు భయపడాల్సిన అవసరం లేదని, వారిపై ఈ లక్ష డాలర్ల రుసుము విధించబోమని భరోసా ఇచ్చారు. వారంతా ఎప్పటిలాగే అమెరికా నుంచి బయటకు వెళ్లి తిరిగి రావొచ్చని, కొత్త నిబంధన వారికి వర్తించదని వివరించారు.
