యువ జంట ఆదర్శ వివాహం.. కట్నం ఎంతో తెలుసా! -

ఒక్క రూపాయి.. ఒక కొబ్బరి కాయ
సామాజిక దురాచారాలపై రాజస్థాన్ కుటుంబం పోరాటం..
దేశానికే ఆదర్శం!

Couple Marries With One Rupee | దేశవ్యాప్తంగా రోజురోజుకూ పెరిగిపోతున్న వరకట్న వేధింపులు, కట్నపు మరణాల వార్తల నడుమ.. సమాజంలో పాతుకుపోయిన ఈ దురాచారాన్ని సవాలు చేస్తూ ఒక కుటుంబం తీసుకున్న నిర్ణయం అందరినీ ఆకర్షిస్తోంది.

రాజస్థాన్‌లోని సికార్ జిల్లా మద్నీ-మండా ప్రాంతానికి చెందిన బురానియా కుటుంబం, కట్న కానుకల ఆర్భాటాలకు దూరంగా.. తమ ఇంట్లో జరిగిన పెళ్లిలో కేవలం ఒక రూపాయి, ఒక కొబ్బరికాయను మాత్రమే స్వీకరించి దేశానికి ఒక స్ఫూర్తిదాయకమైన ఉదాహరణగా నిలిచింది.

ఖాకీ జంట నిరాడంబర వివాహం..

మద్నీ గ్రామానికి చెందిన అర్జున్‌రామ్ బురానియా కుమారుడు సుభాష్ బురానియాకు, రాజస్థాన్ పోలీసు శాఖలో పనిచేస్తున్న మండా నివాసి పంచిలాల్ రబియా కుమార్తె సరోజ్‌కు తాజాగా వివాహం నిశ్చయమైంది.

ఇరు కుటుంబాలు విద్యావంతులు కావడంతో కట్న కానుకల సంప్రదాయాన్ని గట్టిగా వ్యతిరేకించారు. ఎలాంటి ఆడంబరాలు లేకుండా, ప్రతీకాత్మకంగా కేవలం ఒక్క రూపాయి, ఒక కొబ్బరికాయను మాత్రమే ఇచ్చిపుచ్చుకుని అత్యంత నిరాడంబరంగా ఈ పెళ్లి జరిపించారు.

గతంలో ఇదే కుటుంబానికి చెందిన కుమార్తె పింకీ బురానియా వివాహంలో కూడా ఇలాగే ఒక రూపాయి, కొబ్బరికాయతోనే పెళ్లి జరిపించి ఈ సంప్రదాయాన్ని గౌరవించారు.

ఒకే తీర్మానం.. మారిన కుటుంబ గుర్తింపు..

ఈ అరుదైన ఆచారంపై వరుడి కజిన్, డాక్టర్ యుధ్వీర్ సింగ్ బురానియా మాట్లాడుతూ భావోద్వేగానికి గురయ్యారు. “ఇది కేవలం మా ఇంట్లో జరిగిన ఒక పెళ్లి ముచ్చట మాత్రమే కాదు, సంవత్సరాలుగా మా బురానియా కుటుంబానికి ఒక ప్రత్యేక గుర్తింపుగా నిలిచింది.

ఈ సామాజిక మార్పుకు మా తండ్రి బోదురామ్ బురానియా శ్రీకారం చుట్టారు. నా పెద్ద సోదరి డాక్టర్ సుమన్ బురానియా వివాహ సమయంలోనే మేము ఒక గట్టి తీర్మానం చేసుకున్నాం.

భవిష్యత్తులో మా కుటుంబంలో జరిగే ఏ వివాహంలోనూ కట్నం ఇవ్వకూడదని, తీసుకోకూడదని నిర్ణయించాం. సమాజానికి ఒక సానుకూల సందేశాన్ని ఇవ్వడానికే ఈ ఒక్క రూపాయి సంప్రదాయాన్ని కొనసాగిస్తున్నాం.” అని తెలిపారు.

బురానియా కుమార్తెలకు ‘విద్యే’ అసలైన కట్నం..

బురానియా కుటుంబం ప్రాథమికంగా వ్యవసాయ నేపథ్యం నుండి వచ్చినప్పటికీ, చదువుకు వారు అత్యంత ప్రాధాన్యతనిచ్చారు. డబ్బు, బంగారం కంటే విద్యే గొప్ప ఆస్తి అని నమ్ముతారు.

ఈ కుటుంబంలోని కుమార్తెలు డాక్టర్ సుమన్, డాక్టర్ ప్రియాంక ఇద్దరూ వైద్య రంగంలో రాణిస్తుండగా, అన్నయ్య మహేష్ కుమార్ బురానియా సశస్త్ర సీమా బల్ (SSB) లో దేశానికి సేవ అందిస్తున్నారు.

ఈ కుటుంబ అల్లుడు, జైపూర్‌లోని ఎస్ఎమ్ఎస్ (SMS) మెడికల్ కాలేజీ అసిస్టెంట్ ప్రొఫెసర్ డాక్టర్ పంకజ్ నిథర్వాల్ కూడా ఈ సామాజిక దృక్పథాన్ని బలంగా సమర్థిస్తున్నారు.

కుమార్తెలను ఉన్నతంగా చదివించి, వారి కాళ్లపై వారు నిలబడేలా స్వయం సమృద్ధిగా తీర్చిదిద్దడమే తల్లిదండ్రులు ఇచ్చే అతిపెద్ద కట్నమని ఈ కుటుంబం చాటిచెబుతోంది.

ఆర్భాటాల పెళ్లిళ్లతో అప్పులపాలవుతున్న నేటి సమాజానికి బురానియా కుటుంబం చూపుతున్న బాట నిజంగా అభినందనీయం