Monkey Snatches Money Bag | ఉత్తరప్రదేశ్లోని బులంద్షహర్ కోర్టు కాంప్లెక్స్ ఆవరణలో ఒక వింత సంఘటన చోటుచేసుకుంది. ఒక వ్యక్తి చేతిలోని డబ్బుల బ్యాగును లాక్కున్న కోతి, ఆ తర్వాత చెట్టుపైకి ఎక్కి నోట్ల వర్షం కురిపించింది.
చెట్టు పైనుంచి రూ.500 నోట్లు పడుతుండటంతో వాటిని ఏరుకునేందుకు జనం పెద్ద ఎత్తున గుమిగూడారు. ఈ ఊహించని ఘటన కోర్టు ప్రాంగణంలో కాసేపు తీవ్ర కలకలం రేపింది.
బాధితుడు మరియు పోలీసులు తెలిపిన వివరాల ప్రకారం.. రవీంద్ర లోధి అనే వ్యక్తి తన ఆస్తి రిజిస్ట్రేషన్కు సంబంధించిన స్టాంప్ పేపర్లు కొనుగోలు చేయడం కోసం బులంద్షహర్ కోర్టు కాంప్లెక్స్కు వచ్చారు.
రవీంద్ర లోధి తన వద్ద రూ.2 లక్షల నగదు ఉన్న ఒక బ్యాగును పట్టుకుని నిల్చోగా, ఒక్కసారిగా అక్కడికి వచ్చిన ఒక కోతి ఆయన చేతిలోని బ్యాగును బలంగా లాక్కొని పక్కనే ఉన్న చెట్టుపైకి ఎక్కేసింది.
చెట్టుపై కూర్చున్న కోతి ఆ బ్యాగును దారుణంగా చింపేసి, లోపల కట్టలుగా ఉన్న రూ.500 నోట్లను గాల్లోకి విసిరేయడం ప్రారంభించింది. దీంతో కోర్టుకొచ్చిన జనం, పక్కనున్న వారు ఆ నోట్లను ఏరుకోవడానికి ఎగబడ్డారు.
కాసేపు హంగామా చేసిన తర్వాత కోతి ఖాళీ బ్యాగును అక్కడే వదిలేసి వేరే చెట్టుపైకి లంఘించింది. కోర్టు ఆవరణలో నోట్ల వర్షం కురుస్తోందన్న సమాచారంతో స్థానిక పోలీసులు తక్షణమే ఘటనా స్థలానికి చేరుకున్నారు.
పోలీసులు అక్కడ గుమిగూడిన జనాన్ని పక్కకు పంపి, పరిస్థితిని చక్కదిద్దారు. ఆ తర్వాత కింద పడిన నోట్లను, జనం సేకరించిన నగదును లెక్కింపజేశారు.
కోతి విసిరేసిన మొత్తం రూ.2 లక్షల్లో.. పోలీసులు అత్యంత చాకచక్యంగా రూ.1.98 లక్షల విలువైన రూ.500 నోట్లను తిరిగి రికవరీ చేయగలిగారు. కేవలం రూ.2,000 మాత్రమే దొరకకుండా పోయాయి.
రికవరీ చేసిన నగదును పోలీసులు బాధితుడు రవీంద్ర లోధికి అప్పగించడంతో ఆయన ఊపిరి పీల్చుకున్నారు. కాగా, ఈ వింత ఘటనకు సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది.
