- ద్రవ్యోల్బణంపై రాజ్యసభలో ఆర్థిక మంత్రి కీలక ప్రకటన!
Govt Approves Polymer Notes | దేశంలో క్షేత్రస్థాయి పరిశీలన (Field trials) కోసం ₹10 మరియు ₹20 విలువ కలిగిన వంద కోట్ల (ఒక బిలియన్) పాలిమర్ (ప్లాస్టిక్) నోట్లను ప్రవేశపెట్టేందుకు కేంద్ర ప్రభుత్వం ఆమోదం తెలిపింది. ఈ మేరకు ఆర్థిక మంత్రి నిర్మలా సీతారామన్ పార్లమెంటుకు తెలియజేశారు.
మంగళవారం రాజ్యసభలో అడిగిన పలు ప్రశ్నలకు ఆమె లిఖితపూర్వక సమాధానమిస్తూ ఈ వివరాలను వెల్లడించారు.
ప్లాస్టిక్ నోట్ల ట్రయల్స్.. ఆర్బీఐ ప్రతిపాదన
కాగితపు నోట్ల స్థానంలో పాలిమర్ నోట్లను జారీ చేసే అంశంపై ఆర్బీఐ (RBI) ప్రతిపాదనలను ప్రభుత్వం అంగీకరించింది. ఆర్బీఐ చట్టం, 1934లోని సెక్షన్ 25 ప్రకారం క్షేత్రస్థాయి పరిశీలన కోసం ₹10, ₹20 విలువ గల పాలిమర్ నోట్లను (ఒక్కో రకం వంద కోట్ల చొప్పున) ప్రవేశపెట్టాలని ఆర్బీఐ కేంద్ర బోర్డు సిఫార్సు చేసింది.
ప్రస్తుతం ఉపయోగిస్తున్న కాగితపు నోట్లతో పాటు సమాంతరంగా ఈ పాలిమర్ నోట్లను జారీ చేయనున్నారు. ప్రస్తుతం సేకరణ ప్రక్రియ ప్రారంభ దశలో ఉన్నందున వీటిని మార్కెట్లోకి తీసుకొచ్చే కచ్చితమైన సమయం మరియు వ్యయాన్ని ఈ దశలో చెప్పలేమని మంత్రి వివరించారు.
తగ్గిన రిటైల్ ద్రవ్యోల్బణం..
దేశంలో రిటైల్ ద్రవ్యోల్బణం నియంత్రణలోనే ఉందని, వినియోగదారుల ధరల సూచీ (CPI) ఆధారంగా 2023-24లో 5.4 శాతంగా ఉన్న ద్రవ్యోల్బణం, 2024-25లో 4.6 శాతానికి, ఆపై 2025-26లో 2.1 శాతానికి క్రమంగా తగ్గిందని ఆర్థిక మంత్రి పేర్కొన్నారు.
అంతర్జాతీయ ఇంధన ధరలు, పశ్చిమ ఆసియా సంక్షోభం, కూరగాయల ధరల పెరుగుదల కారణాల వల్ల 2026-27 తొలి త్రైమాసికంలో ద్రవ్యోల్బణం 3.9 శాతానికి పెరిగినప్పటికీ, ఇది ఆర్బీఐ నిర్దేశిత 4 శాతం లక్ష్యం కంటే తక్కువగానే ఉందన్నారు.
జిఎస్టీ రేట్ల కుదింపు..
జీఎస్టీ (GST) మండలి 56వ సమావేశంలో రెండు-స్థాయిల పన్ను విధానాన్ని తీసుకొచ్చిందని, దీని ద్వారా 28% ఉన్న పలు పన్ను రేట్లను 18%, 12%, 5% లేదా సున్నా శాతానికి తగ్గించామని తెలిపారు.
ఇంధనం, పామాయిల్ పై సెస్ తగ్గింపు..
అవసరమైన వస్తువుల ధరలు అదుపులో ఉంచేందుకు ముడి పామాయిల్, సోయాబీన్ నూనె, పొద్దుతిరుగుడు నూనెపై బీసీడీ (BCD) తగ్గించామని, మార్చి 2026లో పెట్రోల్, డీజిల్పై కేంద్ర ఎక్సైజ్ సుంకాన్ని లీటరుకు ₹10 చొప్పున తగ్గించినట్లు గుర్తుచేశారు.
ఆదాయపు పన్ను మినహాయింపులతో పెరిగిన కొనుగోలు శక్తి..
పరోక్ష పన్నుల సంస్కరణలతో పాటు, వార్షిక ఆదాయం ₹12 లక్షల వరకు (జీతభత్యాలు పొందే వారికి ప్రామాణిక మినహాయింపులతో కలిపి ₹12.75 లక్షల వరకు) ఆదాయపు పన్ను నుండి మినహాయింపు ఇవ్వడం ద్వారా పౌరుల చేతికి మిగిలే ఆదాయం (Disposable income) పెరిగిందని ఆర్థిక మంత్రి పేర్కొన్నారు.
తలసరి ప్రైవేట్ తుది వినియోగ వ్యయం (PFCE) 2023-24లో 4.8 శాతం నుండి పెరిగి 2025-26లో 6.8 శాతం బలమైన వృద్ధిని నమోదు చేసిందని స్పష్టం చేశారు.
