- సిగ్నల్ లేకపోయినా రూట్ మ్యాప్..
- రూ.3,222 కోట్ల అభివృద్ధి పనులకు సీఎం చంద్రబాబు శ్రీకారం!
CM Chandrababu Launches Venkatadri Navigation App తిరుమల శ్రీవారి భక్తులకు తిరుమల తిరుపతి దేవస్థానం (TTD) సరికొత్త సాంకేతిక సౌకర్యాన్ని అందుబాటులోకి తెచ్చింది. కొండపైకి వచ్చే యాత్రికులు ఎలాంటి ఇబ్బందులు పడకుండా క్యూలైన్లు, వసతి గదులు, అన్నప్రసాద కేంద్రాలు వంటి ముఖ్యమైన ప్రదేశాలను సులభంగా చేరుకునేందుకు ‘వెంకటాద్రి’ పేరుతో తీర్చిదిద్దిన నూతన నావిగేషన్ మొబైల్ అప్లికేషన్‌ను ఆంధ్రప్రదేశ్ ముఖ్యమంత్రి నారా చంద్రబాబు నాయుడు వర్చువల్‌గా ఆవిష్కరించారు. దీనితో పాటు తిరుపతి సమగ్రాభివృద్ధి కోసం టీటీడీ, తుడా (TUDA) సంయుక్తంగా చేపట్టనున్న రూ.3,222 కోట్ల విలువైన భారీ అభివృద్ధి ప్రాజెక్టులకు సచివాలయం నుంచి శ్రీకారం చుట్టారు.
‘వెంకటాద్రి’ యాప్ ప్రత్యేకతలివే..
ఆఫ్‌లైన్ జీపీఎస్ నావిగేషన్: తిరుమల కొండపై ఒకవేళ ఇంటర్నెట్ నెట్‌వర్క్ సిగ్నల్స్ లేకపోయినా ఈ యాప్ ఆఫ్‌లైన్ జీపీఎస్ (Offline GPS) విధానంలో పనిచేస్తుంది.
5 భాషలు & ‘గోవింద’ ఏఐ వాయిస్ అసిస్టెంట్: తెలుగు, ఇంగ్లీష్, హిందీ, తమిళం, కన్నడ భాషల్లో లభించే ఈ యాప్‌లో భక్తులకు మార్గనిర్దేశం చేసేందుకు AI ఆధారిత ‘గోవింద’ వాయిస్ అసిస్టెంట్ సదుపాయం కలదు.
ఎమర్జెన్సీ ట్రాకింగ్: అత్యవసర పరిస్థితుల్లో భక్తులు వైద్యాధికారులను, అంబులెన్స్ లేదా భద్రతా సిబ్బందిని సులభంగా సంప్రదించేలా లొకేషన్ ట్రాకింగ్ సౌకర్యాన్ని చేర్చారు. ఆపిల్ యాప్ స్టోర్, గూగుల్ ప్లే స్టోర్ల నుండి దీనిని డౌన్‌లోడ్ చేసుకోవచ్చు.
అలిపిరి వద్ద రూ.2,750 కోట్లతో సమీకృత యాత్రికుల టౌన్‌షిప్..
తిరుమల కొండపై వసతి, రద్దీ ఒత్తిడిని తగ్గించి తిరుపతిలోనే భక్తులకు ప్రపంచస్థాయి సౌకర్యాలు కల్పించేందుకు అలిపిరి వద్ద ఎస్వీ జూపార్క్ రోడ్డులో భారీ సమీకృత యాత్రికుల టౌన్‌షిప్‌కు శంకుస్థాపన చేశారు. రూ.1,332 కోట్లతో 10 అంతస్తుల చొప్పున 4 బ్లాకుల్లో 2,700 వసతి గదుల నిర్మాణం (రోజుకు 16 వేల మందికి వసతి), రూ.160 కోట్లతో ఒకేసారి 6,000 మంది భోజనం చేసేలా అధునాతన అన్నప్రసాద భవనం, రూ.311 కోట్లతో 4,500 వాహనాలు నిలిపే బహుళ అంతస్తుల పార్కింగ్, రూ.90 కోట్లతో సమీకృత రవాణా టెర్మినల్ నిర్మించనున్నారు.
టీటీడీ ఉద్యోగులకు ఇళ్ల స్థలాలు..
రూ.242 కోట్ల వ్యయంతో తిరుపతిలో ట్రాఫిక్ నివారణకు 20 కిలోమీటర్ల పొడవున 9 మాస్టర్ ప్లాన్ రహదారుల నిర్మాణం చేపట్టనున్నారు. శ్రీవారి సేవలో నిరంతరం శ్రమించే 5,192 మంది టీటీడీ ఉద్యోగులకు 418 ఎకరాల్లో ఇళ్ల స్థలాల లేఔట్ అభివృద్ధి చేయనున్నారు. అంతర్గత రహదారులు, తాగునీరు, డ్రైనేజీ మౌలిక సదుపాయాల కోసం రూ.230 కోట్లు కేటాయించనున్నారు.
ఈ సందర్భంగా సీఎం చంద్రబాబు మాట్లాడుతూ.. “తిరుమల తరహా పవిత్రతను, ఆధ్యాత్మిక వాతావరణాన్ని తిరుపతిలోనూ నింపాలి. తిరుపతిని ఆధ్యాత్మికత, పర్యావరణం, సాంకేతికతల సమ్మేళనంగా అంతర్జాతీయ స్థాయి డెస్టినేషన్‌గా తీర్చిదిద్దుతాం” అని దిశానిర్దేశం చేశారు. ఈ కార్యక్రమంలో టీటీడీ చైర్మన్ బీఆర్ నాయుడు, ఈవో ఎం.రవిచంద్ర తదితరులు పాల్గొన్నారు.
