- ఎస్బీఐ ఉద్యోగి అరెస్ట్!
Nallakunta Wrong Route Accident Sajjanar Tweet బాధ్యతాయుతమైన హోదాలో ఉన్న ఒక బ్యాంకు ఉద్యోగి చేసిన రాంగ్ రూట్ ప్రయాణం.. ఉజ్వల భవిష్యత్తు వైపు అడుగులేస్తున్న ఓ 21 ఏళ్ల ఇంజినీరింగ్ విద్యార్థిని జీవిత ప్రయాణాన్ని నడిరోడ్డుపై శాశ్వతంగా ముగించేసిందని హైదరాబాద్ నగర పోలీస్ కమిషనర్ వి.సి. సజ్జనార్, ఐపీఎస్ తీవ్ర దిగ్భ్రాంతి, ఆవేదన వ్యక్తం చేశారు. నల్లకుంట ఫీవర్ ఆసుపత్రి సమీపంలో సోమవారం ఉదయం జరిగిన ఈ విషాదకర సంఘటనపై ఆయన తన సోషల్ మీడియా (X) వేదికగా స్పందించారు.
నల్లకుంట ఫీవర్ ఆసుపత్రి వద్ద ఘోరం..
నల్లకుంట ఫీవర్ ఆసుపత్రి సిగ్నల్స్ సమీపంలో సోమవారం ఉదయం ఈ రోడ్డు ప్రమాదం చోటుచేసుకుంది. ఉస్మానియా విద్యార్థిని బలి: ఉస్మానియా యూనివర్సిటీ (OU) కాలేజ్ ఆఫ్ ఇంజినీరింగ్‌లో మైనింగ్ ఇంజినీరింగ్ చదువుతున్న షేక్ ఆయేషా ముస్ఫిరా (21) (హఫీజ్‌నగర్ నివాసి) సోమవారం ఉదయం తన తండ్రి మహమ్మద్ ఆరిఫ్‌తో కలిసి బైక్‌పై కాలేజీకి బయలుదేరింది.
నల్లకుంట ఫీవర్ ఆసుపత్రి సమీపంలో వీరు ప్రయాణిస్తుండగా, స్టేట్ బ్యాంక్ ఆఫ్ ఇండియా (SBI) ఉద్యోగి బీఎం ధర్మరాజు నిబంధనలకు విరుద్ధంగా రాంగ్ రూట్‌లో వేగంగా వచ్చి వీరి బైక్‌ను ఢీకొట్టాడు. ప్రమాదంలో బైక్ నియంత్రణ కోల్పోవడంతో పక్కనే వెళ్తున్న ఆర్టీసీ బస్సు వెనుక చక్రాల కింద పడి ఆయేషా అక్కడికక్కడే ప్రాణాలు కోల్పోయింది. నిమిషాల క్రితం వరకు తనతో నవ్వుతూ మాట్లాడిన కుమార్తె కళ్ల ముందే విగతజీవిగా పడిపోవడంతో ఆ తండ్రి గుండెలవిసేలా రోదించిన తీరు అక్కడున్న ప్రతి ఒక్కరినీ కంటతడి పెట్టించింది.
ఎస్బీఐ ఉద్యోగి అరెస్ట్ – సీపీ సజ్జనార్ హెచ్చరిక..
కేవలం రెండు నిమిషాల సమయం ఆదా చేసుకోవాలనే తొందరపాటుతో రాంగ్ రూట్‌లో వచ్చి ఘోర ప్రమాదానికి కారణమైన ఎస్బీఐ ఉద్యోగి బీఎం ధర్మరాజును నల్లకుంట పోలీసులు అరెస్ట్ చేసినట్లు సీపీ సజ్జనార్ ధృవీకరించారు. సమాజంలో బాధ్యతగా ఉండాల్సిన విద్యావంతులే ఇలా ట్రాఫిక్ రూల్స్ పాటించకపోవడం అత్యంత బాధాకరం, క్షమించరాని నేరమని ఆయన పేర్కొన్నారు.
“మీరు ఎంచుకునే రాంగ్ రూట్.. మరొకరి జీవితానికి రాంగ్ ఎండ్ కాకూడదు! ట్రాఫిక్ నిబంధనలను విధిగా పాటించండి.. అమాయకుల ప్రాణాలను బలితీసుకోకండి.” – వి.సి. సజ్జనార్, ఐపీఎస్ (హైదరాబాద్ సీపీ)
