ఏఐ వచ్చినా ఆ ఉద్యోగాలకు ఢోకా లేదు: సీఎం రేవంత్

CM Revanth Reddy National Education Day Speech తెలంగాణ రాష్ట్రంలో విద్య, ఉపాధి అవకాశాలను మెరుగుపరచడానికే తమ ప్రభుత్వం అత్యున్నత ప్రాధాన్యత ఇస్తోందని రాష్ట్ర ముఖ్యమంత్రి ఎనుముల రేవంత్‌రెడ్డి స్పష్టం చేశారు. నగరంలోని బంజారాహిల్స్ ఉన్న ‘సేవాలాల్‌ బంజారా భవన్‌’లో బుధవారం నిర్వహించిన జాతీయ విద్య, మైనార్టీల సంక్షేమ దినోత్సవ కార్యక్రమంలో ఆయన ముఖ్యఅతిథిగా పాల్గొని మాట్లాడారు. సాంకేతిక పరిజ్ఞానం వేగంగా మారుతున్న తరుణంలో కంపెనీల అవసరాలకు తగ్గట్టుగా యువత తమ నైపుణ్యాలను నిరంతరం పెంపొందించుకోవాలని సూచించారు.

స్కిల్ యూనివర్సిటీ, ఏటీసీల ఏర్పాటు..

రాష్ట్రంలోని పారిశ్రామిక శిక్షణా సంస్థలను (ITI) రూపురేఖలు మార్చి, ఆధునిక సాంకేతికతను అందించేలా ఏటీసీలుగా (ATCs) తీర్చిదిద్దుతున్నట్లు తెలిపారు. యువతకు అంతర్జాతీయ స్థాయి ఉపాధి నైపుణ్యాలు కల్పించడానికి అన్ని వసతులతో ప్రత్యేక స్కిల్ యూనివర్సిటీని నిర్మిస్తున్నట్లు వెల్లడించారు. ఆర్టిఫిషియల్‌ ఇంటెలిజెన్స్‌ (AI) విప్లవంతో వైట్‌కాలర్ ఉద్యోగాలకు ముప్పు పొంచి ఉందని, కానీ బ్లూకాలర్ ఉద్యోగాలకు ఎలాంటి ప్రమాదం లేదని ఆయన అభిప్రాయపడ్డారు.

నెహ్రూ, ఆజాద్ ల దార్శనికత..

దేశంలో విద్య, ప్రాజెక్టుల నిర్మాణానికి తొలి ప్రధాని జవహర్‌లాల్ నెహ్రూ బలమైన పునాదులు వేశారని, మౌలానా అబుల్ కలాం ఆజాద్‌ను తొలి విద్యాశాఖ మంత్రిగా నియమించి ఐఐటీలు, విశ్వవిద్యాలయాల ఏర్పాటుకు బీజం వేశారన్నారు. ఆ ఫలితంగానే నేడు భారతీయులు గ్లోబల్ దిగ్గజ సంస్థల్లో ఉన్నత స్థానాల్లో రాణిస్తున్నారని కొనియాడారు. మైనార్టీలకు 4 శాతం రిజర్వేషన్లు కల్పించిన ఘనత కాంగ్రెస్‌దేనని గుర్తుచేశారు. ఇచ్చిన హామీ మేరకు అజారుద్దీన్‌కు మంత్రి పదవి ఇచ్చామని, టీమ్‌ఇండియా స్టార్ క్రికెటర్ మహమ్మద్ సిరాజ్‌కు డీఎస్పీ (DSP) ఉద్యోగం కల్పించామని పేర్కొన్నారు.

మీరాలం కేబుల్ బ్రిడ్జి, పాతబస్తీ నైట్ ఎకానమీ..

పాతబస్తీ అభివృద్ధిపై సీఎం ప్రత్యేక దృష్టిని వివరించారు: పాతబస్తీ మౌలిక సదుపాయాల్లో భాగంగా మీరాలం చెరువుపై రూ.600 కోట్లతో ఆధునిక కేబుల్ బ్రిడ్జి నిర్మిస్తున్నట్లు ప్రకటించారు. మూసీ నది ప్రాజెక్టు అభివృద్ధి పూర్తయితే పాతబస్తీకి పర్యాటకుల రాక పెరుగుతుందని, హైదరాబాద్ నగరంలో ‘నైట్ ఎకానమీ’ (Night Economy) కి కొత్త ఊపిరి వస్తుందని ధీమా వ్యక్తం చేశారు.

ఇదే సమయంలో బీజేపీ ప్రభుత్వంపై విమర్శలు చేస్తూ.. ఎస్‌ఐఆర్ (SIR) పేరుతో పేదలు, మైనార్టీలు, ఎస్టీల ఓట్లను తొలగిస్తున్నారని ఆరోపించారు. రాబోయే ఎన్నికల్లో నరేంద్ర మోదీని ఓడించడమే కాంగ్రెస్ పార్టీ ప్రధాన లక్ష్యమని సీఎం రేవంత్‌రెడ్డి తేల్చిచెప్పారు.