- కేంద్ర మంత్రి ధర్మేంద్ర ప్రధాన్
CBSE OSM Ruckus | సీబీఎస్ఈ (CBSE) తీసుకొచ్చిన కొత్త ‘ఆన్-స్క్రీన్ మార్కింగ్’ (OSM) విధానంపై దేశవ్యాప్తంగా తీవ్ర నిరసనలు, వివాదాలు చెలరేగుతున్న తరుణంలో కేంద్ర విద్యాశాఖ మంత్రి ధర్మేంద్ర ప్రధాన్ కీలక వ్యాఖ్యలు చేశారు.
ఈ గందరగోళానికి తానే పూర్తి బాధ్యత వహిస్తున్నట్లు ఆయన ప్రకటించారు. సీబీఎస్ఈ అధికారులతో ఢిల్లీలో సుదీర్ఘ సమీక్షా సమావేశం నిర్వహించిన అనంతరం ఆయన మీడియాతో మాట్లాడారు.
రీ-ఇవాల్యుయేషన్ (పునఃసమీక్ష) ప్రక్రియలో ఏవైనా అక్రమాలు లేదా అవకతవకలు జరిగినట్లు తేలితే బాధ్యులైన వారిలో “ఎవరినీ వదిలిపెట్టే ప్రసక్తే లేదు” అని మంత్రి విద్యార్థులకు, తల్లిదండ్రులకు గట్టి భరోసా ఇచ్చారు.
విద్యార్థుల ఆందోళన.. అసలు సమస్య ఏంటి?
ఫలితాల అనంతరం స్కాన్ చేసిన సమాధాన పత్రాల (Answer Sheets) కోసం దరఖాస్తు చేసుకున్న వేలాది మంది విద్యార్థులకు చేదు అనుభవం ఎదురైంది.
తమకు అందిన కాపీల్లో పేజీలు స్పష్టంగా లేకపోవడం (Blurred), కొన్ని సమాధానాలను దిద్దకుండా వదిలేయడం, మార్కులు తప్పుగా వేయడం జరిగిందని విద్యార్థులు ఆరోపించారు.
ఫీజుల చెల్లింపుల్లో ఇబ్బందులు..
రీ-ఇవాల్యుయేషన్ కోసం అప్లై చేసుకునే సమయంలో సర్వర్లు డౌన్ అయి పోర్టల్ క్రాష్ అవ్వడం, ఫీజుల పేమెంట్లు ఫెయిల్ అవ్వడం వంటి సమస్యలతో విద్యార్థులు తీవ్ర మానసిక ఒత్తిడికి గురయ్యారు.
ఈ సమస్యలపై విద్యార్థుల ఆందోళనను అంగీకరిస్తూనే, సీబీఎస్ఈ ప్రవేశపెట్టిన ఈ డిజిటల్ మూల్యాంకన నమూనాను మంత్రి ధర్మేంద్ర ప్రధాన్ సమర్థించారు.
“ఈ పరీక్షలకు హాజరైన 17 లక్షల మంది విద్యార్థులకు సంబంధించిన దాదాపు 98 లక్షల సమాధాన పత్రాల స్క్రిప్ట్లను మేము భద్రపరిచాం. ప్రతి ఆన్సర్ బుక్లో దాదాపు 40 పేజీలు ఉంటాయి. అంటే మొత్తంగా దాదాపు 40 కోట్ల పేజీలను స్కాన్ చేయడం జరిగింది” అని మంత్రి గణాంకాలను వివరించారు.
ఈ ‘ఆన్-స్క్రీన్ మార్కింగ్’ (OSM) అనేది ప్రపంచవ్యాప్తంగా విద్యాసంస్థలు వాడుతున్న ఒక అభ్యుదయకరమైన విధానమని, ఇది విద్యార్థులకు మార్కుల విషయంలో పూర్తి పారదర్శకతను అందిస్తుందని ఆయన పేర్కొన్నారు. ప్రస్తుతం తలెత్తిన సాంకేతిక లోపాలను త్వరలోనే పరిష్కరిస్తామని హామీ ఇచ్చారు.
రాజకీయ రంగు పులుముకున్న వివాదం..
సీబీఎస్ఈ మార్కుల వివాదం కాస్తా ఇప్పుడు రాజకీయంగా రాజుకుంది. లోక్సభ ప్రతిపక్ష నేత రాహుల్ గాంధీ ఈ వ్యవహారాన్ని తీవ్రంగా తప్పుబడుతూ ప్రభుత్వం సమాధానం చెప్పాలని డిమాండ్ చేశారు.
రాహుల్ విమర్శలపై స్పందిస్తూ.. సీబీఎస్ఈ ఇప్పటికే తన పక్షాన్ని స్పష్టం చేసిందని, ప్రభుత్వ నిబంధనల ప్రకారమే ప్రొక్యూర్మెంట్ రూల్స్ జరిగాయని మంత్రి చెప్పారు.
రాహుల్ గాంధీ ఎప్పుడూ ‘డిజిటల్ ఇండియా’ను, శాస్త్రీయ పురోగతిని వ్యతిరేకిస్తూనే ఉంటారని మంత్రి ఆరోపించారు.
“రాజకీయాలు తర్వాత చేసుకోవచ్చు, ప్రస్తుతం విద్యార్థుల మానసిక ఒత్తిడిని తగ్గించడమే మా మొదటి ప్రాధాన్యత” అని ధర్మేంద్ర ప్రధాన్ స్పష్టం చేశారు.
