బీ అలెర్ట్.. ప్రధాని మోదీ ‘సివిక్ సత్యాగ్రహం’ పిలుపు!

‌- పెట్రోల్, బంగారంపై ఆంక్షల వెనుక అసలు కారణం ఇదేనా?

Modi Calls For Civic Satyagraha | సికింద్రాబాద్ పరేడ్ గ్రౌండ్స్‌ వేదికగా ప్రధాని నరేంద్ర మోదీ చేసిన ప్రసంగం ఇప్పుడు చర్చనీయాంశంగా మారింది. మునుపెన్నడూ లేని విధంగా “ఒక ఏడాది పాటు బంగారం కొనవద్దు, వర్క్ ఫ్రమ్ హోమ్ చేయండి, పెట్రోల్ వాడకం తగ్గించండి” అంటూ ఆయన చేసిన సూచనలు ప్రజల్లో పలు అనుమానాలకు, ఉత్కంఠకు దారితీశాయి.

అయితే, దీని వెనుక ఒక బలమైన ఆర్థిక మరియు అంతర్జాతీయ కారణం ఉందని నిపుణులు విశ్లేషిస్తున్నారు.

ఎందుకీ అలెర్ట్..
ప్రస్తుతం పశ్చిమాసియాలో (ముఖ్యంగా ఇరాన్-ఇజ్రాయెల్ ఉద్రిక్తతలు) నెలకొన్న యుద్ధ వాతావరణం వల్ల అంతర్జాతీయంగా చమురు సరఫరాకు ఆటంకం కలిగే ప్రమాదం ఉంది.

ముఖ్యంగా ‘స్ట్రెయిట్ ఆఫ్ హార్ముజ్’ (Strait of Hormuz) మూసివేత భయాల నేపథ్యంలో చమురు ధరలు ఆకాశాన్నంటే అవకాశం ఉంది. దీనిని ఎదుర్కోవడానికే ప్రధాని ‘ముందస్తు జాగ్రత్త’గా పెట్రోల్, డీజిల్ వాడకం తగ్గించాలని కోరారు.

విదేశీ మార్పిడి నిల్వల రక్షణ ..
భారత్ దిగుమతి చేసుకునే వస్తువుల్లో చమురు తర్వాత బంగారం రెండో స్థానంలో ఉంది. యుద్ధం వంటి పరిస్థితుల్లో రూపాయి విలువ పడిపోకుండా ఉండాలంటే, విదేశీ కరెన్సీ (డాలర్లు) బయటకు వెళ్లకుండా చూడాలి. అందుకే ఒక ఏడాది పాటు బంగారం కొనుగోలును వాయిదా వేయాలని, విదేశీ టూర్లు వద్దని ప్రధాని సూచించారు.

వర్క్ ఫ్రమ్ హోమ్..
ట్రాఫిక్ మరియు ఇంధన వినియోగాన్ని తగ్గించడానికి మళ్ళీ కోవిడ్ తరహాలో ‘వర్క్ ఫ్రమ్ హోమ్’ పద్ధతిని అమలు చేయాలని, వ్యక్తిగత వాహనాలకు బదులు మెట్రో వంటి ప్రజా రవాణాను వాడాలని ప్రధాని కోరారు.

స్వదేశీ నినాదం..
విదేశీ బ్రాండ్ల కంటే ‘మేడ్ ఇన్ ఇండియా’ వస్తువులకు ప్రాధాన్యత ఇవ్వడం ద్వారా దేశీ ఆర్థిక వ్యవస్థను బలోపేతం చేయాలని ఆయన పిలుపునిచ్చారు. దీనినే ఆయన “సివిక్ సత్యాగ్రహం” (Civic Satyagraha) గా అభివర్ణించారు.

నిపుణుల అభిప్రాయం..
ప్రధాని ఇలాంటి సూచనలు చేస్తున్నారంటే రాబోయే రోజుల్లో అంతర్జాతీయ ఆర్థిక పరిస్థితులు మరింత క్లిష్టంగా మారే అవకాశం ఉందని అర్థం. అందుకే ప్రజలు అనవసర ఖర్చులను తగ్గించుకుని, ఆర్థికంగా అలెర్ట్‌ గా ఉండటం మంచిదని నిపుణులు సూచిస్తున్నారు.