SC AI Chatbot Su-Sahayak | భారత అత్యున్నత న్యాయస్థానం (Supreme Court) డిజిటల్ విప్లవం దిశగా మరో భారీ అడుగు వేసింది. న్యాయ ప్రక్రియలో పారదర్శకతను పెంచడానికి, కేసుల నిర్వహణను సులభతరం చేయడానికి శ్రీకారం చుట్టింది.
అందులో భాగంగా ఇంటిగ్రేటెడ్ కేస్ మేనేజ్మెంట్ సిస్టమ్ (ICMS) మరియు కృత్రిమ మేధస్సుతో పనిచేసే ‘సు-సహాయక్’ (Su-Sahayak) చాట్బాట్ను ప్రారంభించింది.
ఏమిటీ ‘సు-సహాయక్’?
ఇది సుప్రీంకోర్టు అధికారిక వెబ్సైట్ మరియు యాప్లో అందుబాటులో ఉండే ఒక AI అసిస్టెంట్. దీని ద్వారా సామాన్య పౌరులు, న్యాయవాదులు తమ సందేహాలకు తక్షణమే సమాధానాలు పొందవచ్చు.
మీ కేస్ నంబర్ ఇస్తే చాలు.. ప్రస్తుతం ఆ కేస్ ఏ దశలో ఉంది, తదుపరి విచారణ ఎప్పుడు అనే వివరాలను సు-సహాయక్ వెంటనే చెబుతుంది. కేవలం ఇంగ్లీష్లోనే కాకుండా తెలుగుతో సహా పలు ప్రాంతీయ భాషల్లో ఈ చాట్బాట్ సేవలు అందిస్తుంది.
న్యాయ సమాచారం..
కోర్టు ఫీజులు, పిటిషన్ దాఖలు చేసే విధానం వంటి ప్రాథమిక న్యాయ సందేహాలకు ఇది మార్గదర్శిగా పనిచేస్తుంది. ఎప్పుడైనా, ఎక్కడి నుండైనా కేసు వివరాలను ట్రాక్ చేసే వెసులుబాటు ఉంటుంది.
ఇంటిగ్రేటెడ్ కేస్ మేనేజ్మెంట్ సిస్టమ్ (ICMS)..
ఇది కోర్టు రికార్డులను పూర్తిగా డిజిటలైజ్ చేస్తుంది. దీనివల్ల కాగితాల వినియోగం తగ్గి, కేసుల ఫైలింగ్ నుండి తీర్పుల వరకు అన్నీ వేగంగా జరుగుతాయి. దిగువ కోర్టుల నుండి సుప్రీంకోర్టు వరకు డేటా ఒకే నెట్వర్క్ కిందకు వస్తుంది.
