"ఆ పెళ్లి ఎప్పటికీ జరగదు.." సియా గోయల్ స్నాప్‌చాట్ చాట్ లీక్!

కేతన్ అగర్వాల్ హత్య కేసులో మరో సంచలన విషయం.

Ketan Agarwal Case Update | మహారాష్ట్రలో తీవ్ర సంచలనం సృష్టించిన ప్రముఖ యువ వ్యాపారవేత్త కేతన్ అగర్వాల్ (26) హత్య కేసు విచారణలో మరో సంచలన విషయం వెలుగులోకి వచ్చింది.

తన కాబోయే భర్తను లోహగడ్ కోట (Lohagad Fort) పైనుంచి లోయలోకి తోసి చంపినట్లు ఆరోపణలు ఎదుర్కొంటున్న ప్రధాన నిందితురాలు సియా గోయల్ (20), తన స్నేహితురాలితో జరిపిన స్నాప్‌చాట్ (Snapchat) సంభాషణ ఇప్పుడు బయటకు వచ్చింది.

హత్య జరగడానికి సుమారు మూడు వారాల ముందే, అంటే మే 25న జరిగిన ఈ చాటింగ్.. కేతన్ హత్య పూర్తిగా ముందస్తు ప్రణాళికతో (Premeditated Murder) చేసినదేనని చెప్పడానికి బలమైన ఆధారంగా నిలుస్తోంది.

“జరగని పెళ్లికి టిక్కెట్లు..” – చాట్‌లో అసలు నిజాలు..

సోషల్ మీడియాలో వైరల్ అవుతున్న ఈ ఆరోపిత చాట్‌లో, ఒక పెళ్లికి ఫ్లైట్ టిక్కెట్లు బుక్ చేయడం కోసం సియా తన స్నేహితురాలిని ఆధార్ కార్డు వివరాలు అడుగుతుంది. ఆ తర్వాత ఆమె చేసిన కామెంట్స్ దర్యాప్తు అధికారులను సైతం షాక్‌కు గురిచేశాయి.

“ఆధార్ కార్డు ముందు, వెనుక భాగాలు ఫొటో తీసి పంపించు. ఎలాగూ జరగని పెళ్లికి టిక్కెట్లు బుక్ చేసుకోవడం కోసమైనా సరే పంపించు,” అని సియా తన స్నేహితురాలికి నిర్మొహమాటంగా మెసేజ్ పంపింది.

తప్పుడు కథనం కోసమేనా?

నవంబర్‌లో జరగాల్సిన పెళ్లి అసలు జరగదనే విషయం సియాకు ముందే తెలుసని ఈ చాట్ ద్వారా స్పష్టమవుతోంది.

హత్య తర్వాత పోలీసుల అనుమానాన్ని మళ్లించడానికి, ఒక తప్పుడు కథనాన్ని సృష్టించేందుకే పక్కా ప్లాన్ ప్రకారం ఈ ఫ్లైట్ బుకింగ్స్ డ్రామా ఆడారా? అనే కోణంలో పూణే పోలీసులు దర్యాప్తు ముమ్మరం చేశారు.

కోడ్ వర్డ్స్ కలకలం – నిందితులకు జ్యుడీషియల్ కస్టడీ..

ఈ కుట్రలో సియా స్నేహితురాలికి కూడా భాగస్వామ్యం ఉందా లేదా అనేదానిపై స్పష్టత రావాల్సి ఉంది. అయితే, కేతన్‌ను చంపే ప్లాన్ తెలిసిన మూడో వ్యక్తిగా చేతన్ క్లాస్‌మేట్‌ను పోలీసులు గుర్తించారు.

సియా గోయల్, ఆమె ప్రియుడు చేతన్ చౌదరి (22)ల పోలీస్ కస్టడీ గడువు ముగియడంతో కోర్టు వారికి 14 రోజుల జ్యుడీషియల్ కస్టడీ (Judicial Custody) విధించి జైలుకు తరలించింది.

ఫోన్లలో కోడ్ లాంగ్వేజ్..

విచారణ సందర్భంగా నిందితుల కస్టడీని పొడిగించాలని పోలీసులు కోర్టును కోరారు. సియా, చేతన్‌లు తమ ఫోన్ సంభాషణలలో ప్రమాదకరమైన “కోడ్ పదాలు” (Code Words) ఉపయోగించారని, శుక్రవారం సియాకు చెందిన మరొక రహస్య ఫోన్‌ను కూడా స్వాధీనం చేసుకున్నామని పబ్లిక్ ప్రాసిక్యూటర్ వాదించారు.

డేటాను డీకోడ్ చేయడానికి ముఖాముఖి విచారణ అవసరమని కోరినప్పటికీ, కోర్టు కస్టడీ పొడిగింపునకు నిరాకరించింది.

ఈ ఏడాది ప్రారంభంలోనే కేతన్, సియాల నిశ్చితార్థం ఘనంగా జరిగింది. నవంబర్‌లో రాజస్థాన్‌లోని ఉదయ్‌పూర్‌లో రాయల్ వెడ్డింగ్ కోసం రెండు ప్రత్యేక విమానాలను కూడా బుక్ చేశారు.

కానీ, జూన్ 18న లోహగడ్ కోట వద్ద కేతన్‌ను అత్యంత క్రూరంగా కొండపైనుంచి తోసి చంపడంతో అగర్వాల్ కుటుంబంలో విషాదం నిండింది.

తాజాగా లభించిన డిజిటల్ ఆధారాల ద్వారా కేసును మరింత బలోపేతం చేసేందుకు పోలీసులు ప్రయత్నిస్తున్నారు.