No LIfe Tax For 2nd Vehicle | వాహనదారులకు తెలంగాణ ప్రభుత్వం (Telangana Govenrment) భారీ ఊరట కలిగించనుంది. రెండో వాహనం కొనుగోలుపై విధిస్తున్న 2 శాతం అదనపు జీవితకాల పన్నును రద్దు చేయాలని నిర్ణయించినట్లు తెలిస్తోంది.
ఈ మేరకు రవాణా శాఖ పంపిన ప్రతిపాదనకు సీఎం రేవంత్ రెడ్డి ఆమోదం తెలిపినట్లు సమాచారం. త్వరలోనే దీనిపై అధికారిక ఉత్తర్వులు వెలువడనున్నాయి. ప్రస్తుతం రాష్ట్రంలో రెండో వాహనం కొనేవారు అదనంగా 2 శాతం పన్ను చెల్లిస్తున్నారు.
ఉదాహరణకు రూ.1.20 లక్షల విలువైన బైక్ను రెండో వాహనంగా కొంటే రూ.2,400 అదనంగా చెల్లించాలి. వాహన ఉద్గారాల ద్వారా వెలువడే కాలుష్య నియంత్రించడానికి రెండో వాహనం కొనుగోళ్లను తగ్గించాలని గతంలో ఈ పన్నును ప్రవేశపెట్టారు.
అయితే, చాలామంది ఈ పన్నును తప్పించుకోవడానికి తమ కుటుంబసభ్యుల పేర్ల మీద వాహనాలు రిజిస్ట్రేషన్ చేయిస్తున్నారు. దీనివల్ల బీమా క్లెయిమ్ల సమయంలో సాంకేతిక ఇబ్బందులు ఎదురవుతున్నాయి.
మరోవైపు తెలంగాణ ప్రభుత్వం జాతీయ డిజిటల్ ప్లాట్ఫామ్ ‘వాహన్’లో చేరాలని నిర్ణయించింది. ఈ పోర్టల్లో ఒక వ్యక్తికి ఇదివరకే వాహనం ఉందో లేదో గుర్తించేందుకు ప్రత్యేక ఆప్షన్ లేదు. దీనికోసం ప్రత్యేక సాఫ్ట్ వేర్ రూపొందించడం ఖర్చుతో కూడుకున్న పని కావడంతో ఈ అదనపు పన్నును రద్దు చేయడమే సరైన మార్గమని రవాణా శాఖ ప్రభుత్వానికి సూచించింది.
