StockGro Breakup Leave Policy మానసిక ఆరోగ్యం, ఉద్యోగుల శ్రేయస్సుకు ప్రాధాన్యమిస్తూ బెంగళూరుకు చెందిన ఫిన్టెక్ మరియు సోషల్-లెర్నింగ్ స్టార్టప్ ‘స్టాక్గ్రో’ (StockGro) ఒక సంచలనాత్మక నిర్ణయం తీసుకుంది.
ప్రేమ వ్యవహారాల్లో విఫలమైన (Break-up) తమ ఉద్యోగుల కోసం ప్రత్యేకంగా “బ్రేక్-అప్ లీవ్” (Break-up Leave) విధానాన్ని ప్రవేశపెట్టి దేశవ్యాప్తంగా అందరి దృష్టిని ఆకర్షించింది.
పాలసీ ముఖ్య విశేషాలు..
వ్యక్తిగత జీవితంలో భాగస్వామితో విడిపోయి మానసిక ఒత్తిడి ఎదుర్కొంటున్న ఉద్యోగులు తక్షణమే పనికి రావాల్సిన అవసరం లేకుండా 7 రోజుల పాటు వేతనంతో కూడిన (Paid Leave) సెలవు పొందే వెసులుబాటు కల్పించారు.
ఈ సెలవును పొందడానికి ఉద్యోగులు తమ వ్యక్తిగత చాట్లు, ఫోటోలు లేదా విడిపోయినట్లు నిరూపించే ఎలాంటి ప్రైవేట్ ఆధారాలను కంపెనీకి సమర్పించాల్సిన అవసరం లేదు.
సెలవు పొడిగింపు కూడా..
కష్టమైన భావోద్వేగ పరిస్థితి నుంచి కోలుకోవడానికి అదనపు సమయం కావాలనుకుంటే, కంపెనీ హెచ్ఆర్ (HR) విధానాలు మరియు ఆమోదం ఆధారంగా ఈ సెలవును మరింత పొడిగించుకోవచ్చు.
విస్తృత చర్చకు తెర..
కార్యాలయాల్లో కేవలం శారీరక ఆరోగ్యానికే కాకుండా, ఉద్యోగుల వ్యక్తిగత మరియు భావోద్వేగ సవాళ్లకు కూడా కంపెనీలు ప్రాధాన్యత ఇవ్వాలా వద్దా అనే దానిపై ఈ కొత్త చొరవ ప్రస్తుతం కార్పొరేట్ వర్గాల్లో ఒక విస్తృతమైన చర్చను రేకెత్తించింది.
