Rat Steals Jewelry | కర్ణాటకలోని తుమకూరులో ఓ ఎలుక ఊహించని విధంగా “ఆభరణాల దొంగ”గా మారింది. ఓ నగల దుకాణం నుంచి సుమారు రూ.10 లక్షల విలువైన వజ్రాలు పొదిగిన బంగారు ఆభరణాలను ఎత్తుకెళ్లింది. ఈ ఘటన సీసీటీవీలో రికార్డు కావడంతో వీడియో సోషల్ మీడియాలో వైరల్ అవుతోంది.
ఆభరణాలు కనిపించక సిబ్బందిలో ఆందోళన
దుకాణంలో ఎలాంటి తాళాలు పగలగొట్టిన ఆనవాళ్లు లేకపోయినా, విలువైన ఆభరణాలు కనిపించలేదు. దీంతో దుకాణం సిబ్బంది తీవ్ర ఆందోళనకు గురయ్యారు. మొదట పోలీసులకు ఫిర్యాదు చేయాలని భావించారు.
సీసీటీవీలో బయటపడిన అసలు నిజం
ఫిర్యాదు చేసే ముందు సీసీటీవీ ఫుటేజీని పరిశీలించగా అసలు విషయం బయటపడింది. ఓ ఎలుక ఒక్కో బంగారు ఆభరణాన్ని నోటితో పట్టుకుని తీసుకెళ్తున్న దృశ్యాలు కెమెరాలో స్పష్టంగా నమోదయ్యాయి.
బొరియలో దొరికిన రూ.10 లక్షల ఆభరణాలు
ఎలుక వెళ్లిన దారిని అనుసరించిన సిబ్బంది దాని బొరియను గుర్తించారు. బొరియను తవ్వి చూడగా 10 వజ్రాలు పొదిగిన బంగారు ఉంగరాలు, మూడు నెక్లెస్లు సహా అదృశ్యమైన అన్ని ఆభరణాలు లభించాయి.
దీంతో దుకాణం యాజమాన్యం ఊపిరి పీల్చుకుంది. ఈ అరుదైన ఘటన ప్రస్తుతం సోషల్ మీడియాలో వైరల్గా మారింది.
