Megastar Chiranjeevi 20 Lakh Aid | మెగాస్టార్ చిరంజీవి (Megastar Chiranjeevi) తన ఉదార స్వభావాన్ని మరోసారి చాటుకున్నారు. ఆపదలో ఉన్న వారిని ఆదుకోవడంలో తనకు తానే సాటి అని నిరూపిస్తూ, ఒకే వారంలో రెండు వేర్వేరు వైద్య అత్యవసర పరిస్థితుల కోసం ఏకంగా రూ. 20 లక్షల ఆర్థిక సాయం అందించి అందరినీ ఆశ్చర్యపరిచారు.
అత్యవసర గుండె శస్త్రచికిత్స కోసం ఎదురుచూస్తున్న మేకప్ ఆర్టిస్ట్ శివకు చిరంజీవి రూ. 10.5 లక్షలు అందజేశారు. కేవలం డబ్బు ఇవ్వడమే కాకుండా, అపోలో హాస్పిటల్లో అతడికి మెరుగైన వైద్యం అందేలా స్వయంగా పర్యవేక్షించారు.
తన మాజీ మేనేజర్ కేవీ నరసయ్య భార్య బైపాస్ సర్జరీ కోసం చిరంజీవి రూ. 9.5 లక్షల సహాయం చేశారు. కుటుంబ సభ్యులు ఆర్థిక ఇబ్బందుల్లో ఉన్నారని తెలుసుకున్న వెంటనే ఆయన బాధ్యత తీసుకుని, హాస్పిటల్ యాజమాన్యంతో మాట్లాడి బిల్లులో రాయితీ వచ్చేలా చేయడమే కాకుండా మిగిలిన మొత్తాన్ని స్వయంగా చెల్లించారు.
ఇటీవలే తనకు లభించిన ఎన్టీఆర్ అవార్డు ప్రైజ్ మనీ రూ. 10 లక్షలను చారిటబుల్ ట్రస్టులకు, అలాగే తెలుగు ఫిలిం జర్నలిస్ట్ అసోసియేషన్ (TFJA) కు రూ. 5 లక్షలను విరాళంగా ఇచ్చారు. ఇప్పుడు మరో రూ. 20 లక్షల సహాయం చేయడంతో ఆయన సేవా దృక్పథంపై ప్రశంసల జల్లు కురుస్తోంది.
సినిమా యూనియన్ సభ్యులు సహాయం కోసం చిరంజీవిని సంప్రదించినప్పుడు, “నేను చూసుకుంటాను, మీరేమీ భయపడకండి” అని వారికి భరోసా ఇచ్చి అండగా నిలిచారు. కోట్లాది మందికి ఆదర్శంగా నిలుస్తున్న చిరంజీవి ఈ చర్యలు ఆయన పట్ల గౌరవాన్ని మరింత పెంచుతున్నాయి.
