Actor Vishal Comments | కోలీవుడ్ స్టార్ హీరో దళపతి విజయ్ రాజకీయాల్లోకి ఎంట్రీ ఇచ్చిన విషయం తెల్సిందే. కాగా విజయ బాటలోనే మరో స్టార్ హీరో విశాల్ కూడా రాజకీయాల్లోకి ఎంట్రీ ఇవ్వనున్నారంటూ, కొత్త రాజకీయ పార్టీ పెట్టనున్నారు అని జోరుగా ప్రచారం జరుగుతోంది.
ఈ సందర్భంగా జరుగుతున్న ప్రచారం పై స్పందించారు హీరో విశాల్. ఈ మేరకు ఒక బహిరంగ లేఖను విడుదల చేసారు. సమాజంలో ఒక నటుడిగా, సామాజిక సేవలో ప్రజల్లో ఒకరిగా హోదా, గుర్తింపు ఇచ్చిన తమిళ ప్రజలకు ఎప్పటికి రుణపడి ఉంటానని తెలిపారు విశాల్.
ప్రజల అభ్యున్నతి కోసం తల్లి ‘ దేవి ఫౌండేషన్’ పేరిట ఎంతోమంది పేదలకు సేవ చేసినట్లు పేర్కొన్నారు. అలాగే మాజీ రాష్ట్రపతి అబ్దుల్ కలాం పేరిట విద్యార్థులకు కూడా సాయం చేస్తున్నట్లు వెల్లడించారు. కానీ రాజకీయ లాభాలను ఆశించి తానెప్పుడూ ప్రజలకు సహాయం చేయలేదని స్పష్టం చేశారు ఈ కోలీవుడ్ హీరో.
ప్రస్తుతానికి మాత్రం ఈ ప్రజా సేవను కొనసాగిస్తానని, భవిష్యత్ లో ప్రకృతి మరేదైనా నిర్ణయం తీసుకుంటే ప్రజల పక్షాన, ప్రజల్లో ఒకడిగా, వారికోసం పోరాటం చేయడానికి సంకోచించనని నర్మగర్భ వ్యాఖ్యలు చేశారు విశాల్.
