CM Revanth Reddy Biopic | తెలంగాణ రెండో ముఖ్యమంత్రిగా టీపీసీసీ చీఫ్ రేవంత్ రెడ్డి గురువారం ప్రమాణ స్వీకారం చేశారు. ఈ నేపథ్యంలో ప్రముఖ సినీ నటుడు, నిర్మాత బండ్ల గణేష్ సంచలన ప్రకటన చేశారు.
ఇటీవల జరిగిన అసెంబ్లీ ఎన్నికల్లో కాంగ్రెస్ పార్టీ ఘన విజయానికి కారణమైన రేవంత్ రెడ్డి బయోపిక్ తీస్తానని బండ్ల గణేశ్ ప్రకటించారు. గురువారం సీఎం ప్రమాణ స్వీకార సభాస్థలం ఎల్బీ స్టేడియం వద్ద మీడియా తో మాట్లాడారు బండ్ల గణేష్.
ఈ మేరకు త్వరలోనే రేవంత్ రెడ్డి జీవిత చరిత్రను బయోపిక్ సినిమా తీస్తానంటూ ప్రకటించారు. ఒక సాధారణ రైతు కుటుంబంలో పుట్టి విద్యార్థి నాయకుడిగా మొదలై ఈరోజు తెలంగాణ సీఎం గా ప్రమాణ స్వీకారం చేయడం ఏ సినిమా కథకు తక్కువ కాదని తెలిపారు బండ్ల.
అలాగే రేవంత్ రెడ్డి జీవితం లో లవ్ స్టోరీ మొదలుకొని, ఒక సినిమాకు ఉండాల్సిన అన్నీ హంగులు ఉన్నాయని పేర్కొన్నారు. త్వరలోనే సిఎం ను కలిసి బయోపిక్ పై చర్చిస్తానని స్పష్టం చేశారు. కాగా 2018 ఎన్నికల్లో మరియు ఇటీవల జరిగిన అసెంబ్లీ ఎన్నికల్లో కాంగ్రెస్ పార్టీకి మద్దతుగా నిలిచారు బండ్ల గణేష్.
