- విద్యార్థులతో పాటు టీచర్లకూ అల్పాహారం, మధ్యాహ్న భోజనం!
Telangana Govt Teachers Free Midday Meals | రాష్ట్రంలోని ప్రభుత్వ విద్యాసంస్థల్లో పనిచేస్తున్న ఉపాధ్యాయులు, లెక్చరర్లు, మరియు ఇతర సిబ్బందికి తెలంగాణ ప్రభుత్వం బంపర్ ఆఫర్ ప్రకటించింది.
ప్రభుత్వ పాఠశాలలు, జూనియర్ కళాశాలల్లో కేవలం విద్యార్థులకే కాకుండా, వారితో పాటు బోధన మరియు బోధనేతర సిబ్బంది అందరికీ ఉచితంగా అల్పాహారం (Breakfast), మధ్యాహ్న భోజనం (Mid-day Meal) అందించాలని రాష్ట్ర ప్రభుత్వం ఒక సంచలన నిర్ణయం తీసుకుంది.
ముఖ్యమంత్రి రేవంత్ రెడ్డి అధ్యక్షతన గురువారం సాయంత్రం రాష్ట్ర సచివాలయంలో సుదీర్ఘంగా జరిగిన మంత్రిమండలి (Cabinet) సమావేశంలో ఈ మేరకు పలు కీలక తీర్మానాలు చేశారు.
రాష్ట్ర సచివాలయంలో జరిగిన ఈ క్యాబినెట్ భేటీలో విద్యా రంగానికి సంబంధించి అపూర్వమైన నిర్ణయం తీసుకున్నారు.
ఉపాధ్యాయులకూ వర్తింపు..
సాధారణంగా పాఠశాలల్లో మధ్యాహ్న భోజన పథకం కేవలం విద్యార్థులకు మాత్రమే పరిమితమై ఉంటుంది. కానీ, ఇకపై రాష్ట్రవ్యాప్తంగా ఉన్న సుమారు 1,50,000 (లక్షా యాభై వేల) మంది ప్రభుత్వ పాఠశాల ఉపాధ్యాయులు, జూనియర్ కళాశాలల లెక్చరర్లు, మరియు ఇతర సిబ్బంది అందరికీ ఈ అల్పాహార, మధ్యాహ్న భోజన పథకాన్ని వర్తింపజేయాలని మంత్రివర్గం ఏకగ్రీవంగా తీర్మానించింది.
ప్రభుత్వ నిర్ణయం పట్ల రాష్ట్రవ్యాప్తంగా ఉన్న ఉపాధ్యాయ సంఘాలు, లెక్చరర్ల అసోసియేషన్లు హర్షం వ్యక్తం చేస్తున్నాయి.
‘వీబీజీ రామ్జీ’ పథకంపై సుప్రీంకోర్టుకు రాష్ట్ర ప్రభుత్వం!
ఈ క్యాబినెట్ సమావేశంలో విద్యా సంస్కరణలతో పాటు కేంద్ర ప్రభుత్వ విధానాలపై కూడా కీలక చర్చ జరిగింది.
‘వీబీజీ రామ్జీ’ (VBG Ramji) పథకంపై దేశంలోని పలు రాష్ట్రాల నుండి తీవ్ర భిన్నాభిప్రాయాలు, వ్యతిరేకత వ్యక్తమైనప్పటికీ.. వాటిని ఏమాత్రం పరిగణనలోకి తీసుకోకుండా సదరు పథకాన్ని అలాగే మున్ముందుకు కొనసాగించాలని కేంద్ర ప్రభుత్వం పట్టుదలగా నిర్ణయించింది.
న్యాయపోరాటానికి సిద్ధం..
కేంద్రం తీసుకున్న ఈ ఏకపక్ష నిర్ణయాన్ని నిరసిస్తూ, రాష్ట్రాల హక్కుల పరిరక్షణ కోసం ఈ ‘వీబీజీ రామ్జీ’ పథకం అంశంపై దేశ అత్యున్నత న్యాయస్థానమైన సుప్రీంకోర్టును (Supreme Court) ఆశ్రయించాలని ముఖ్యమంత్రి రేవంత్ రెడ్డి నేతృత్వంలోని మంత్రివర్గ సమావేశం ఒక కీలక నిర్ణయానికి వచ్చింది.
