CM Revanth On Moosi Development | మూసీ నదీ పరివాహక అభివృద్ధిపై నానక్ రామ్ గూడ హెచ్ఎండీఏ (HMDA) కార్యాలయంలో అధికారులతో సీఎం రేవంత్ రెడ్డి (CM Revanth Reddy) సోమవారం సమీక్ష నిర్వహించారు. ఈ సందర్భంగా మూసీ రివర్ బౌండరీస్ లొకేషన్ స్కెచ్ తో పాటు పలు వివరాలను అధికారులు సీఎంకు వివరించారు.
అనంతరం సీఎం రేవంత్ మాట్లాడుతూ మూసీ అభివృద్ధి ప్రక్రియ వీలైనంత త్వరగా ప్రారంభించేందుకు కసరత్తు పూర్తి చేయాలని అధికారులకు ఆదేశాలు జారీ చేశారు. దానికోసం ముందుగా మూసీ క్లీనింగ్ ప్రక్రియను పూర్తి చేయాలని సూచించారు.
నగరంలోని చారిత్రక కట్టడాలను కలుపుతూ ఉండేలా మూసీ అభివృద్ధికి ప్రణాళికలు రూపొందించాలని సీఎం పేర్కొన్నారు. అధికారులకు పని విభజన చేసి మూసీ నదీ పరివాహక అభివృద్ధికి చర్యలు వేగవంతం చేయాలని సీఎం రేవంత్ రెడ్డి సూచించారు.