Real Life Spider Man Al Khakha Died | యెమెన్ దేశానికి చెందిన ‘రియల్ లైఫ్ స్పైడర్ మ్యాన్’గా ప్రపంచవ్యాప్తంగా గుర్తింపు తెచ్చుకున్న ప్రముఖ స్టంట్ ఆర్టిస్ట్ ‘అల్ ఖాఖా’ విషాదాంతమయ్యారు.
ఎటువంటి భద్రతా పరికరాలు లేకుండా కేవలం స్పైడర్ మ్యాన్ దుస్తులు ధరించి అసాధ్యమైన కొండలు, నిటారైన గోడలు ఎక్కుతూ లక్షలాది మంది అభిమానులను సంపాదించుకున్న ఆయన, ఒక ప్రమాదకరమైన సాహస విన్యాసం చేస్తూ ప్రాణాలు కోల్పోయారు.
అగ్నిపర్వత క్రేటర్లో ఘోర ప్రమాదం..
గత శుక్రవారం దక్షిణ యెమెన్లోని అత్యంత ప్రమాదకరమైన ‘హరాధత్ దామత్’ అగ్నిపర్వత క్రేటర్ (Volcanic Crater) వద్ద అల్ ఖాఖా ఒక సాహస విన్యాసానికి సిద్ధమయ్యారు. కొండ అంచున విన్యాసం చేస్తుండగా ఒక్కసారిగా పట్టుతప్పి లోతైన, అత్యంత వేడిగా ఉన్న నీటి గుండంలో ఆయన పడిపోయారు.
స్థానికులు మరియు అభిమానులు ఆయన చేస్తున్న సాహసాన్ని వీడియోలు తీస్తుండగానే ఈ ఘోర ప్రమాదం చోటుచేసుకుంది. ప్రమాదం జరిగిన వెంటనే రంగంలోకి దిగిన సివిల్ డిఫెన్స్ డైవర్లు (Civil Defense Divers) తీవ్రంగా శ్రమించి అల్ ఖాఖా మృతదేహాన్ని బయటకు తీశారు.
ఆ నీటి గుండం అత్యంత లోతుగా ఉండటం, దానికి తోడు నీరు విపరీతమైన వేడితో ఉడకబడుతుండటంతో రెస్క్యూ ఆపరేషన్ నిర్వహించడం సహాయక సిబ్బందికి అత్యంత క్లిష్టంగా మారింది.
హెచ్చరించినా వినని సాహసికుడు..
ఫేస్బుక్లో సుమారు 2.5 లక్షల (250K) మంది ఫాలోవర్లను కలిగి ఉన్న అల్ ఖాఖా, గతంలో ఎన్నోసార్లు మరణాన్ని సైతం లెక్కచేయకుండా ఎత్తైన కొండలు, లోతైన గుహలు, స్కైస్క్రాపర్లు ఎక్కి ఆ వీడియోలను సోషల్ మీడియాలో విడుదల చేశారు.
ఈ క్రమంలో స్థానికులు, అధికారులు ఆయన ప్రాణాలకు ముప్పు ఉందని ఎన్నిసార్లు హెచ్చరించినా.. సాహసాలపై ఉన్న మక్కువతో ఆయన వాటిని అస్సలు వీడలేదు. చివరికి ఆ సాహసమే ఆయన ప్రాణాలను బలితీసుకోవడంతో సోషల్ మీడియా వేదికగా అభిమానులు తీవ్ర సంతాపం వ్యక్తం చేస్తున్నారు.
