ADR Report Chief Ministers Assets | దేశంలోని ముఖ్యమంత్రుల ఆస్తులు, క్రిమినల్ కేసులు, విద్యార్హతలు, వయస్సు తదితర వివరాలపై అసోసియేషన్ ఫర్ డెమొక్రటిక్ రిఫార్మ్స్ (ADR) విడుదల చేసిన తాజా నివేదిక దేశవ్యాప్తంగా చర్చనీయాంశంగా మారింది.
ఎన్నికల సమయంలో ముఖ్యమంత్రులు ఎన్నికల సంఘానికి సమర్పించిన అఫిడవిట్ల ఆధారంగా ఈ నివేదికను రూపొందించినట్లు ADR వెల్లడించింది.
నివేదిక ప్రకారం దేశంలోని 28 రాష్ట్రాలు, 3 కేంద్ర పాలిత ప్రాంతాలకు చెందిన మొత్తం 31 మంది ముఖ్యమంత్రుల ప్రకటిత ఆస్తుల మొత్తం విలువ రూ.3,660 కోట్లు. ఇందులో కర్ణాటక ముఖ్యమంత్రి డీకే శివకుమార్ రూ.1,413 కోట్ల ప్రకటిత ఆస్తులతో దేశంలోనే అత్యంత సంపన్న ముఖ్యమంత్రిగా నిలిచారు.
ఆంధ్రప్రదేశ్ ముఖ్యమంత్రి నారా చంద్రబాబు నాయుడు రూ.931 కోట్ల ప్రకటిత ఆస్తులతో రెండో స్థానంలో నిలవగా, తమిళనాడు ముఖ్యమంత్రి జోసెఫ్ విజయ్ రూ.648 కోట్లతో మూడో స్థానాన్ని దక్కించుకున్నారు.
తెలంగాణ ముఖ్యమంత్రి రేవంత్ రెడ్డి రూ.30 కోట్లకు పైగా ప్రకటిత ఆస్తులతో దేశంలో ఎనిమిదో స్థానంలో ఉన్నారు.
అతి తక్కువ ఆస్తులు ప్రకటించిన సీఎంలు
అతి తక్కువ ఆస్తులు ప్రకటించిన ముఖ్యమంత్రుల జాబితాలో జమ్మూ కశ్మీర్ ముఖ్యమంత్రి ఒమర్ అబ్దుల్లా రూ.55 లక్షలతో తొలి స్థానంలో ఉన్నారు.
పశ్చిమ బెంగాల్ ముఖ్యమంత్రి సువేందు అధికారి రూ.85 లక్షల ప్రకటిత ఆస్తులతో రెండో స్థానంలో నిలవగా, రాజస్థాన్ ముఖ్యమంత్రి భజన్లాల్ శర్మ సుమారు రూ.1 కోట్ల ఆస్తులతో మూడో స్థానంలో ఉన్నారు.
14 మంది సీఎంలపై క్రిమినల్ కేసులు
ADR నివేదికలో ఎక్కువ చర్చకు కారణమైన అంశం ముఖ్యమంత్రులపై నమోదైన క్రిమినల్ కేసులే. మొత్తం 31 మంది ముఖ్యమంత్రుల్లో 14 మందిపై క్రిమినల్ కేసులు నమోదైనట్లు నివేదిక పేర్కొంది.
ఈ జాబితాలో తెలంగాణ ముఖ్యమంత్రి రేవంత్ రెడ్డి 89 కేసులతో అగ్రస్థానంలో నిలిచారు. ఆయన తర్వాత పశ్చిమ బెంగాల్ ముఖ్యమంత్రి సువేందు అధికారిపై 29 కేసులు నమోదైనట్లు వెల్లడైంది.
కర్ణాటక ముఖ్యమంత్రి డీకే శివకుమార్, ఆంధ్రప్రదేశ్ ముఖ్యమంత్రి నారా చంద్రబాబు నాయుడుపై చెరో 19 కేసులు ఉన్నట్లు ADR పేర్కొంది. వీరిద్దరిపై హత్యాయత్నానికి సంబంధించిన కేసులు కూడా నమోదైనట్లు నివేదికలో వెల్లడించింది.
అయితే, ఎన్నికల అఫిడవిట్ ప్రకారం రేవంత్ రెడ్డి ప్రకటించిన 89 కేసుల్లో ఎక్కువశాతం రాజకీయ నిరసనలు, ర్యాలీలు, ధర్నాలు, ఎన్నికల ప్రచార కార్యక్రమాల సందర్భంగా నమోదైనవేనని వివరాలు సూచిస్తున్నాయి. ఈ కేసుల్లో చాలా వరకు ప్రస్తుతం వివిధ కోర్టుల్లో విచారణ దశలో ఉన్నాయి.
కేసులు నమోదై ఉండటం మాత్రమే నేరం రుజువైనట్లు కాదని, ఎన్నికల అఫిడవిట్లలో అభ్యర్థులు స్వయంగా ప్రకటించిన వివరాలనే ఈ నివేదికలో పొందుపరిచినట్లు ADR స్పష్టం చేసింది.
వయస్సు వివరాలు
వయస్సు పరంగా పరిశీలిస్తే, దేశంలోని 31 మంది ముఖ్యమంత్రుల్లో 17 మంది 51 నుంచి 60 సంవత్సరాల మధ్య వయస్సు కలిగి ఉన్నారు. మరో 8 మంది 41 నుంచి 50 సంవత్సరాల మధ్య ఉన్నట్లు నివేదిక తెలిపింది.
మొత్తంగా చూస్తే, సంపన్న ముఖ్యమంత్రుల జాబితాలో దక్షిణాది రాష్ట్రాల ముఖ్యమంత్రులు తొలి మూడు స్థానాలను కైవసం చేసుకోగా, క్రిమినల్ కేసుల సంఖ్యలో తెలంగాణ ముఖ్యమంత్రి రేవంత్ రెడ్డి అగ్రస్థానంలో నిలవడం ఈ ADR నివేదికలో ప్రధాన చర్చకు దారితీసింది.
