- కేంద్ర కేబినెట్ సంచలన నిర్ణయం!
Agniveer Tenure 2 Year Extension కేంద్ర ప్రభుత్వం ‘అగ్నిపథ్’ పథకంలో కీలక మార్పులు చేస్తూ సంచలన ప్రకటన చేసింది. అగ్నివీరుల సర్వీసు కాలాన్ని మరో రెండు సంవత్సరాలు (2 ఇయర్స్) పొడిగిస్తున్నట్లు కేంద్ర కేబినెట్ బుధవారం నిర్ణయం తీసుకుంది.
ప్రధాని నరేంద్ర మోదీ అధ్యక్షతన జరిగిన కేంద్ర మంత్రిమండలి సమావేశంలో ఈ మేరకు ఆమోదం తెలిపారు. మొదటి బ్యాచ్‌కి చెందిన దాదాపు 18,000 మంది అగ్నివీరుల 4 ఏళ్ల పదవీ కాలం ముగిసి, వారు దళాల నుంచి బయటకు రావడానికి కొద్ది వారాల ముందు కేంద్రం ఈ ప్రకటన చేయడం విశేషం.
చీఫ్ ఆఫ్ డిఫెన్స్ స్టాఫ్ (CDS) వివరణ..
ఈ నిర్ణయంపై చీఫ్ ఆఫ్ డిఫెన్స్ స్టాఫ్ (CDS) జనరల్ ఎన్.ఎస్. రాజా సుబ్రమణి మాట్లాడారు. త్రివిధ దళాలలో విధులు నిర్వర్తిస్తున్న అగ్నివీరులందరికీ తమ సర్వీసును కొనసాగించేందుకు అవకాశం లభిస్తుందని సీడీఎస్ తెలిపారు. ఈ పొడిగింపు మరియు సర్వీసు కొనసాగింపు అనేది వారి పనితీరు (Performance) మరియు సమీక్ష ఆధారంగా ఉంటుందని స్పష్టం చేశారు.
“అగ్నిపథ్ పథకం ప్రారంభం నుంచే దీనిని ఎప్పటికప్పుడు సమీక్షిస్తామని స్పష్టంగా చెప్పాం. ప్రతీ సంవత్సరం అగ్నివీరుల పనితీరును సమీక్షించి, చివరకు రెండేళ్ల సర్వీసు పొడిగింపు ఇవ్వాలని నిర్ణయానికి వచ్చాం” అని జనరల్ సుబ్రమణి వెల్లడించారు.
పాత నిబంధనలు – తాజా మార్పులు..
2022లో ప్రారంభించిన అగ్నిపథ్ పథకం ప్రకారం.. సైనికులను 4 ఏళ్ల కాలానికి రిక్రూట్ చేసుకునేవారు. 4 ఏళ్ల సర్వీస్ తర్వాత కేవలం 25% మందిని మాత్రమే రెగ్యులర్ సర్వీసులోకి తీసుకుని, మిగిలిన 75% మందిని విడుదల చేసేవారు.
75% పరిమితి కారణంగా బయటకు వెళ్లాల్సి ఉన్న అగ్నివీరులకు కూడా ఈ 2 ఏళ్ల సర్వీస్ ఎక్స్‌టెన్షన్ వర్తిస్తుంది. ఆ తర్వాత వారి పనితీరు ఆధారంగా త్రివిధ దళాలలో పూర్తిస్థాయి రిక్రూట్‌మెంట్‌కు మార్గం సుగమమవుతుంది.
తక్కువ వ్యవధి సర్వీస్ (4 ఏళ్లు) వల్ల యువత భవిష్యత్తుపై విమర్శలు వ్యక్తమైన సంగతి తెలిసిందే. ఈ నేపథ్యంలో ఉత్తర ప్రదేశ్, హర్యానా, మహారాష్ట్ర వంటి పలు రాష్ట్రాలు అగ్నివీరులకు పోలీసు మరియు ఇతర ప్రభుత్వ ఉద్యోగాల్లో రిజర్వేషన్లు కూడా ప్రకటించాయి.
యువతకు దేశసేవ చేసే అవకాశం కల్పించడం, సాయుధ దళాల ప్రొఫైల్‌ను మరింత యువ శక్తితో, డైనమిక్‌గా మార్చడమే లక్ష్యంగా కేంద్ర ప్రభుత్వం ఈ అగ్నిపథ్ పథకాన్ని తీసుకొచ్చింది.
