Kangana Ranaut vs Sourav Das | బీజేపీ ఎంపీ, ప్రముఖ సినీనటి కంగనా రనౌత్ మరియు కాక్రోచ్ జనతా పార్టీ (సీజేపీ) అధికార ప్రతినిధి సౌరవ్ దాస్ మధ్య సోషల్ మీడియాలో తీవ్ర వాగ్వాదం చోటుచేసుకుంది.
నీట్-యూజీ 2026 ఉద్యమంపై కంగనా చేసిన విమర్శలకు ప్రతిస్పందించిన సౌరవ్ దాస్ వ్యాఖ్యలపై ఆమె వరుస ఇన్స్టాగ్రామ్ స్టోరీల ద్వారా ఘాటుగా స్పందించారు.
‘విద్యార్థిని ఎలా అంటారు?’
సౌరవ్ దాస్ ఏఎన్ఐకి ఇచ్చిన ఇంటర్వ్యూను షేర్ చేసిన కంగనా, “ఈ వ్యక్తి వయసు 28 ఏళ్లు. అయినా తనను తాను విద్యార్థిని అని ఎలా చెప్పుకుంటున్నాడో అర్థం కావడం లేదు” అని వ్యాఖ్యానించారు.
అలాగే, “ఆయన వయసులోనే నేను రెండు జాతీయ అవార్డులు అందుకున్నాను. నేను ఎంపీ మాత్రమే కాదు.. దర్శకురాలు, నిర్మాత, స్క్రీన్రైటర్, పారిశ్రామికవేత్తను కూడా. ఎప్పుడూ పనిలో బిజీగా ఉంటాను” అంటూ తన విజయాలను ప్రస్తావించారు.
‘పనికిరాని నిరుద్యోగి’ అంటూ విమర్శ
సౌరవ్ దాస్ను ఉద్దేశించి కంగనా తీవ్ర వ్యాఖ్యలు చేశారు. “నువ్వు విద్యార్థివి కాదు.. పూర్తిగా పనికిరాని నిరుద్యోగివి. ముందుగా ఏదైనా నైపుణ్యం నేర్చుకో” అంటూ విమర్శించారు.
అంతకుముందు సీజేపీ నిరసనలకు సంబంధించిన వీడియోలను షేర్ చేస్తూ, “ఇంత అసహ్యమైన దృశ్యాలు నేను ఎప్పుడూ చూడలేదు. వాళ్లు మాట్లాడే తీరు, ప్రవర్తన చూస్తే డిజిటల్ డిటాక్స్ అవసరం అనిపిస్తోంది” అని కూడా వ్యాఖ్యానించారు.
కంగనాకు సౌరవ్ దాస్ కౌంటర్
కంగనా వ్యాఖ్యలను సౌరవ్ దాస్ తీవ్రంగా ఖండించారు. “కంగనా రనౌత్ను ఆమె సొంత పార్టీ నాయకులే సీరియస్గా తీసుకోరు. అలాంటప్పుడు మేమెందుకు తీసుకోవాలి?” అని ప్రశ్నించారు.
జెన్-జెడ్, యువత గురించి కంగనా చేసిన వ్యాఖ్యలను కూడా ఆయన తప్పుబట్టారు. ప్రజా ప్రతినిధిగా బాధ్యతాయుతంగా వ్యవహరించాల్సిన అవసరం ఉందని సూచించారు.
నీట్ ఉద్యమం నుంచే మొదలైన వివాదం
నీట్-యూజీ 2026 పేపర్ లీక్ వ్యవహారంపై జరిగిన నిరసనల్లో సీజేపీ కీలక పాత్ర పోషించింది. ఆ ఉద్యమంపై కంగనా గత కొన్ని వారాలుగా విమర్శలు చేస్తుండగా, సౌరవ్ దాస్ ఆమె వ్యాఖ్యలను వరుసగా ఖండిస్తున్నారు. దీంతో ఇరువురి మధ్య సోషల్ మీడియా వేదికగా మాటల యుద్ధం కొనసాగుతోంది.
