GHMC organises Indie puppy adoption Drive at KBR Park in Hyderabad | రాజ్యసభ సభ్యురాలు రేణుక చౌదరి మరియు మంత్రి సీతక్క చెరొక కుక్కపిల్లలను దత్తత తీసుకున్నారు. హైదరాబాద్ జూబ్లీహిల్స్ లోని కేబీఆర్ పార్కులో వాలెంటైన్స్ డే సందర్భంగా శనివారం జీహెచ్ఎంసీ ఆధ్వర్యంలో ‘కుక్కపిల్లల దత్తత మేళా’ కార్యక్రమం జరిగింది. ఈ కార్యక్రమంలో మంత్రులు సీతక్క, కొండా సురేఖ, ఎంపీ రేణుక చౌదరి మరియు ఎమ్మెల్సీ బల్మూరి వెంకట్ పాల్గొన్నారు. ఈ సందర్భంగా సీతక్క, రేణుక చౌదరి చెరొక వీధి కుక్క పిల్లలను దత్తత తీసుకున్నారు.
ఈ కార్యక్రమంలో భాగంగా ఆరోగ్యంగా ఉన్న, వ్యాక్సిన్ చేయబడిన మొత్తం 50 కుక్కపిల్లలను ప్రదర్శించారు. వీటిలో ముప్పై పిల్లలను ప్రజలు దత్తత తీసుకున్నారు. ఈ క్రమంలో దత్తత తీసుకున్న వారితో మంత్రులు మాట్లాడారు. కుక్కపిల్లలను వారికి అప్పగించి అభినందించారు. శునకాలు ఎల్లప్పుడూ నమ్మకమైన సహచరులుగా ఉంటాయని నొక్కిచెప్పారు. స్థానిక జాతులను దత్తత తీసుకోవాలని పిలుపునిచ్చారు.
