Supreme Court Grants Bail Two Convicts Bilkis Bano Case దేశవ్యాప్తంగా సంచలనం సృష్టించిన 2002 నాటి బిల్కిస్ బానో సామూహిక అత్యాచారం, ఆమె కుటుంబ సభ్యుల హత్య కేసులో ఇద్దరు దోషులకు సుప్రీంకోర్టు షరతులతో కూడిన బెయిల్ మంజూరు చేసింది. ఇప్పటికే 17 ఏళ్లకు పైగా జైలు శిక్ష అనుభవించడాన్ని పరిగణనలోకి తీసుకున్న సర్వోన్నత న్యాయస్థానం, వారి జీవిత ఖైదు శిక్షను సస్పెండ్ చేస్తూ ఉత్తర్వులు జారీ చేసింది.
జస్టిస్ ఎం.ఎం. సుందరేష్, జస్టిస్ ప్రసన్న బి. వరాలేలతో కూడిన ధర్మాసనం అక్టోబర్ 28న ఈ మేరకు ఆదేశాలు వెలువరించింది. దోషులు బిపిన్చంద్ కనైయాలాల్ జోషి, ప్రదీప్ రమణ్లాల్ మోధియాలను ట్రయల్ కోర్టు విధించే షరతులకు లోబడి బెయిల్పై విడుదల చేయాలని స్పష్టం చేసింది.
17 ఏళ్లకు పైగా జైలు శిక్ష..
ఈ ఇద్దరు దోషులు ఇప్పటికే 17 సంవత్సరాలకు పైగా కారాగార శిక్ష అనుభవించారని ధర్మాసనం తన ఉత్తర్వుల్లో పేర్కొంది. దోషులలో ఒకరు తీవ్రమైన శారీరక వైకల్యంతో (Physically disabled) బాధపడుతున్న విషయాన్ని కోర్టు పరిగణనలోకి తీసుకుంది. అలాగే, మరొక దోషి పేరు అసలు ఎఫ్ఐఆర్ (FIR) లో లేదని, ఘటన జరిగిన దాదాపు మూడేళ్ల తర్వాత అతడిని ఈ కేసులో చేర్చారని ధర్మాసనం గమనించింది.
అప్పీళ్లపై విచారణ..
తమకు విధించిన జీవిత ఖైదును సమర్థిస్తూ 2017లో బాంబే హైకోర్టు ఇచ్చిన తీర్పును సవాలు చేస్తూ వీరిద్దరూ సుప్రీంకోర్టులో అప్పీళ్లు దాఖలు చేశారు. ఈ అప్పీళ్లలో ఇంకా తేల్చాల్సిన చట్టపరమైన, వాస్తవిక అంశాలు ఉన్నాయని పేర్కొన్న ధర్మాసనం, తుది తీర్పు వెలువడే వరకు వీరికి బెయిల్ మంజూరు చేసింది.
కేసు నేపథ్యం ఇదీ..
2002 గుజరాత్ అల్లర్ల సమయంలో బిల్కిస్ బానోపై సామూహిక అత్యాచారానికి పాల్పడటంతో పాటు ఆమె కుటుంబంలోని ఏడుగురిని హత్య చేసిన కేసులో మొత్తం 11 మందికి జీవిత ఖైదు పడింది. 2022 ఆగస్టులో గుజరాత్ ప్రభుత్వం వీరికి క్షమాభిక్ష (Remission) ప్రసాదించి ముందస్తుగా విడుదల చేయగా.. 2024 జనవరిలో సుప్రీంకోర్టు ఆ విడుదల ఉత్తర్వులను రద్దు చేసి, దోషులందరినీ తిరిగి జైలుకు వెళ్లాలని ఆదేశించింది. తాజాగా ఇద్దరు దోషులకు సుప్రీంకోర్టు బెయిల్ మంజూరు చేయడం ప్రాధాన్యత సంతరించుకుంది.











