Abhijit Deepke Slapped In Jaipur | దేశవ్యాప్తంగా సంచలనం సృష్టిస్తున్న నీట్ (NEET) ప్రశ్నపత్రం లీక్ వ్యవహారానికి వ్యతిరేకంగా కాక్రోచ్ జనతా పార్టీ ఒక నిరసన కార్యక్రమం చేపట్టిన సంగతి తెలిసిందే.
ఈ నేపథ్యంలో CJP వ్యవస్థాపకుడు అభిజిత్ దీప్కేపై ఒక యువకుడు ఒక్కసారిగా దాడి చేసి చెంపదెబ్బ కొట్టాడు.
జైపూర్లోని ‘షహీద్ స్మారక్’ వద్ద మీడియా కళ్ల ముందే జరిగిన ఈ ఘటనకు సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
నిందితుడి ఆరోపణలు..
‘షహీద్ స్మారక్’ వద్ద నిరసన కార్యక్రమం జరుగుతుండగా ఒక యువకుడు అకస్మాత్తుగా అభిజిత్ దీప్కే వద్దకు వచ్చి ఈ దాడికి పాల్పడ్డాడు.
వెంటనే అప్రమత్తమైన పోలీసులు సదరు యువకుడిని అదుపులోకి తీసుకున్నారు. అభిజిత్ దీప్కేకు “జిహాదీ మనస్తత్వం” ఉందని, అందుకే తాను కొట్టానని నిందితుడు బహిరంగంగా ఆరోపించాడు.
‘కాక్రోచ్ జనతా పార్టీ’ దేశ ప్రజలను అనవసరంగా తప్పుదోవ పట్టిస్తోందని విమర్శించాడు. తాను జైపూర్కు చెందిన స్వచ్ఛమైన దేశభక్తుడినని, తనకు ఏ రాజకీయ పార్టీతోనూ సంబంధం లేదని అక్కడున్న పాత్రికేయులతో నిందితుడు స్పష్టం చేశాడు.
అసలు జైపూర్లో CJP నిరసన ఎందుకు?
నీట్ (NEET) ప్రశ్నపత్రాల లీకేజీ వ్యవహారంలో కేంద్ర ప్రభుత్వం, విద్యాశాఖ వైఫల్యాన్ని నిరసిస్తూ కాక్రోచ్ జనతా పార్టీ ఈ ధర్నాకు పిలుపునిచ్చింది. ఈ లీకేజీకి బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే తన పదవికి రాజీనామా చేయాలనే ప్రధాన డిమాండ్తో ఈ నిరసన చేపట్టారు.
యువత సమస్యలపై పోరాటం
దేశంలో పెరుగుతున్న నిరుద్యోగం, విద్యా రంగంలో జరుగుతున్న వరుస అవకతవకలు, ప్రభుత్వ నియామక పరీక్షల్లో ప్రశ్నపత్రాల లీకేజీలు, విద్యార్థులు-తల్లిదండ్రులు ఎదుర్కొంటున్న మానసిక ఆందోళనలపై తాము పోరాడుతున్నామని కార్యక్రమ సమన్వయకర్త దీపక్ బలియాన్ వెల్లడించారు.
ఈ నిరసన ప్రదర్శనలో పార్టీ వ్యవస్థాపకుడు అభిజిత్ దీప్కేతో పాటు జాతీయ ప్రతినిధి అశుతోష్ రంకా, పలువురు ముఖ్య నాయకులు, సామాజిక కార్యకర్తలు పెద్ద సంఖ్యలో పాల్గొన్నారు.
కాగా, ఈ ఘటన జరిగిన జైపూర్ నగరంలోనే నర్సింగ్ సిబ్బంది చేపట్టిన నిరవధిక సమ్మె ధర్నా కూడా సోమవారానికి నాలుగో రోజుకు చేరడంతో జైపూర్లో పొలిటికల్ హీట్ ఒక్కసారిగా పెరిగింది.
