ఎన్టీఆర్ – అనిల్ రావిపూడి సినిమా అధికారిక ప్రకటన!

Jr NTR Anil Ravipudi Movie Official Announcement టాలీవుడ్ యంగ్ టైగర్ జూనియర్ ఎన్టీఆర్, వరుస బ్లాక్‌బస్టర్ విజయాలతో దూసుకుపోతున్న దర్శకుడు అనిల్ రావిపూడి కాంబినేషన్‌లో ఓ క్రేజీ ప్రాజెక్ట్ పట్టాలెక్కనుంది. సినీ వర్గాల్లో ఎప్పటినుంచో వినిపిస్తున్న ఈ క్రేజీ కాంబోను శనివారం (నవంబర్ 14) ఎన్టీఆర్, అనిల్ రావిపూడి సోషల్ మీడియా వేదికగా అధికారికంగా ప్రకటించారు.

ఎక్స్ (Twitter) వేదికగా దర్శకుడు అనిల్ రావిపూడితో కలిసి ఉన్న ఫొటోను పంచుకున్న ఎన్టీఆర్.. “ఈ చిత్రం ఒక నవ్వుల జాతరలా ఉండబోతోంది” (This one’s going to be a laugh riot) అని పేర్కొంటూ #NTRxAnilRavipudi అనే హ్యాష్‌ట్యాగ్‌ను జత చేశారు. ఈ పోస్ట్‌లో తన సోదరుడు నందమూరి కల్యాణ్ రామ్‌తో పాటు ఎన్టీఆర్ ఆర్ట్స్ నిర్మాణ సంస్థను కూడా ట్యాగ్ చేశారు.

ఈ ప్రతిష్టాత్మక చిత్రాన్ని నందమూరి కల్యాణ్ రామ్ తన సొంత బ్యానర్ ఎన్టీఆర్ ఆర్ట్స్ (NTR Arts) పై నిర్మించనున్నారు.

మాస్ vs కామెడీ మేళవింపు..

సాధారణంగా జూనియర్ ఎన్టీఆర్ హై-వోల్టేజ్ మాస్, యాక్షన్ కథాంశాలకు పెట్టింది పేరు కాగా.. అనిల్ రావిపూడి నాన్‌స్టాప్ ఫ్యామిలీ, కామెడీ ఎంటర్‌టైనర్లకు కేరాఫ్ అడ్రస్‌గా నిలిచారు. పూర్తి భిన్నమైన శైలులు కలిగిన ఈ ఇద్దరి కలయిక సినీ ప్రియుల్లో భారీ అంచనాలను రేకెత్తిస్తోంది.

ప్రస్తుతం జూనియర్ ఎన్టీఆర్, దర్శకుడు ప్రశాంత్ నీల్ కాంబినేషన్‌లో తెరకెక్కుతున్న భారీ యాక్షన్ చిత్రం ‘డ్రాగన్’ (Dragon) షూటింగ్‌లో బిజీగా ఉన్నారు. ఈ సినిమా పూర్తయిన వెంటనే అనిల్ రావిపూడి ప్రాజెక్ట్ సెట్స్ పైకి వెళ్లనుంది.

మరోవైపు దర్శకుడు అనిల్ రావిపూడి ప్రస్తుతం విక్టరీ వెంకటేశ్, నందమూరి కల్యాణ్ రామ్ కాంబినేషన్‌లో ఓ మల్టీస్టారర్ చిత్రాన్ని తెరకెక్కిస్తున్నారు. ఈ చిత్రం 2027 సంక్రాంతి కానుకగా విడుదల కానుంది.

సోషల్ మీడియాలో ట్రెండింగ్..

ఎన్టీఆర్ – అనిల్ రావిపూడి సినిమా అధికారిక ప్రకటన వెలువడిన క్షణాల్లోనే ఎక్స్ వేదికగా #NTRxAnilRavipudi హ్యాష్‌ట్యాగ్ జాతీయ స్థాయిలో ట్రెండింగ్‌లోకి వచ్చింది. బాక్సాఫీస్ వద్ద ఈ నవ్వుల విందు సరికొత్త రికార్డులు సృష్టిస్తుందని నందమూరి అభిమానులు ధీమా వ్యక్తం చేస్తున్నారు. చిత్రంలోని ఇతర నటీనటులు, సాంకేతిక బృందం వివరాలను త్వరలోనే అధికారికంగా ప్రకటించనున్నారు.