Actor Vishal Meets CM Vijay | తమిళనాడు ముఖ్యమంత్రి విజయ్ను కోలీవుడ్ ప్రముఖ నటుడు, నిర్మాత విశాల్ ఇటీవల మర్యాదపూర్వకంగా కలుసుకున్నారు.
ఈ భేటీ అనంతరం విశాల్ తన సోషల్ మీడియా వేదికగా పంచుకున్న ఒక ఎమోషనల్ పోస్ట్ ప్రస్తుతం నెటిజన్లను, ఇరు హీరోల అభిమానులను విశేషంగా ఆకట్టుకుంటోంది.
ముఖ్యమంత్రి విజయ్ను ఉద్దేశించి ‘డార్లింగ్ సీఎం విజయ్’ అంటూ విశాల్ చేసిన వ్యాఖ్యలు ఇప్పుడు తమిళనాట హాట్ టాపిక్గా మారాయి.
లయోలా కాలేజీ రోజుల నాటి బంధం..
ముఖ్యమంత్రి విజయ్ను తాను ‘డార్లింగ్’ అని పిలవడం వెనుక ఉన్న పాత జ్ఞాపకాలను విశాల్ ఈ సందర్భంగా పంచుకున్నారు.
తామిద్దరం చెన్నైలోని లయోలా కాలేజీలో చదువుకునే రోజుల నుంచే విజయ్ను ‘డార్లింగ్’ అని పిలుస్తున్నానని, ఇప్పటికీ అదే పిలుపు, ఆప్యాయత కొనసాగుతోందని విశాల్ తెలిపారు.
కాలేజీ రోజుల్లో, సినీ ప్రస్థానంలో ఎన్నేళ్ల క్రితం తాము ఎలా కలుసుకునేవారో, ఇప్పుడు రాష్ట్ర ముఖ్యమంత్రి వంటి అత్యున్నత పదవిలో ఉన్నప్పటికీ విజయ్ వ్యక్తిత్వంలో ఎలాంటి మార్పు రాలేదని, ఇప్పటికీ అదే ఆత్మీయత చూపించారని కొనియాడారు.
సినిమా రంగంలో ఒక సామాన్య యువ నటుడిగా ప్రారంభమైన విజయ్ ప్రయాణం, కోలీవుడ్ సూపర్స్టార్ స్థాయికి చేరిన తీరు తనను ఎంతగానో ఆకట్టుకుందని విశాల్ పేర్కొన్నారు.
ఆ తర్వాత ఆయన రాజకీయాల్లోకి అడుగుపెట్టి, ఎన్నో విమర్శలు, సవాళ్లను మౌనంగా భరిస్తూ, వాటన్నింటినీ అధిగమించి నేడు రాష్ట్ర ముఖ్యమంత్రిగా బాధ్యతలు చేపట్టడం గొప్ప విషయమన్నారు.
ఈ సందర్భంగా గతంలో దివంగత నేతలు కరుణానిధి, జయలలితలతో పాటు ప్రస్తుత నేతలు స్టాలిన్, ఉదయనిధి వంటి వారితో తనకు ఉన్న అనుబంధాన్ని కూడా విశాల్ గుర్తు చేసుకున్నారు.
బొకేలు, శాలువాలు వద్దు.. ముగ్గురు బాలికల చదువుకు సాయం..
ముఖ్యమంత్రి విజయ్ను కలిసిన సందర్భంలో విశాల్ ఒక వైవిధ్యమైన, ఆదర్శవంతమైన నిర్ణయం తీసుకున్నారు.
సాధారణంగా సీఎంలను కలిసినప్పుడు ఇచ్చే సంప్రదాయ బొకేలు, శాలువాలకు అనవసరంగా ఖర్చు చేయకుండా.. ఆ డబ్బును ముగ్గురు నిరుపేద బాలికల విద్య కోసం వినియోగించినట్లు విశాల్ వెల్లడించారు.
ఈ విద్యా సహాయాన్ని ముఖ్యమంత్రి ‘విజయ్’ పేరుతోనే అందించినట్లు, ఆ బాలికలు తమ జీవితాంతం ఆయన్ను గుర్తుంచుకుంటారని చెప్పారు. విజయ్ పాలనలో తమిళనాడు రాష్ట్రం మరింత ప్రగతి పథంలో దూసుకుపోవాలని ఆకాంక్షిస్తూ విశాల్ తన సందేశాన్ని ముగించారు.
