New Bank Rules From April 1st | ఏప్రిల్ 1 నుంచి కొత్త ఆర్థిక సంవత్సరం ప్రారంభం కాబోతున్న నేపథ్యంలో, బ్యాంకింగ్ రంగంలో పలు కీలక మార్పులు అమల్లోకి రానున్నాయి.
రిజర్వ్ బ్యాంక్ ఆఫ్ ఇండియా (RBI) మార్గదర్శకాలకు అనుగుణంగా హెచ్డీఎఫ్సీ (HDFC), పంజాబ్ నేషనల్ బ్యాంక్ (PNB) వంటి ప్రధాన బ్యాంకులు నగదు ఉపసంహరణలు, సేవా రుసుములపై కొత్త నిబంధనలను ప్రకటించాయి.
ఇప్పటివరకు ఏటీఎంలలో క్యూఆర్ కోడ్ స్కాన్ చేసి నగదు తీసుకునే సదుపాయంపై ప్రత్యేక ఛార్జీలు లేవు. కానీ ఏప్రిల్ 1 నుంచి యూపీఐ ద్వారా తీసే నగదును కూడా నెలవారీ ఉచిత ఏటీఎం లావాదేవీల (Free Limits) కోటాలోనే లెక్కిస్తారు.
మెట్రో నగరాల్లో 3 సార్లు, నాన్-మెట్రో నగరాల్లో 5 సార్లు ఉచిత పరిమితి దాటితే, యూపీఐ ద్వారా చేసే ప్రతి విత్డ్రాపై రూ. 23 + పన్నులు చెల్లించాల్సి ఉంటుంది.ఇక పంజాబ్ నేషనల్ బ్యాంక్ తమ డెబిట్ కార్డుల ద్వారా రోజువారీ నగదు తీసుకునే పరిమితిని సగానికి తగ్గించింది.
ప్లాటినం, గోల్డ్, బిజినెస్ కార్డులకు సంబంధించి రోజువారీ పరిమితి రూ. 1,00,000 నుంచి రూ. 50,000కు తగ్గింది. సెలెక్ట్, సిగ్నేచర్ కార్డుల ద్వారా పరిమితిని రూ. 1,50,000 నుంచి రూ. 75,000కు కుదించింది.
బంధన్ బ్యాంక్ కూడా తమ వినియోగదారులకు షాక్ ఇచ్చింది. నిర్దేశించిన పరిమితికి మించి చేసే లావాదేవీలపై అదనంగా రూ. 10 చొప్పున వసూలు చేయనున్నట్లు ప్రకటించింది.
ఆన్లైన్ మరియు ఏటీఎం మోసాలను అరికట్టేందుకు బ్యాంకులు భద్రతను మరింత కఠినతరం చేశాయి. ఇకపై ఓటీపీ (OTP) తో పాటు పిన్ లేదా బయోమెట్రిక్ వంటి రెండంచెల భద్రత తప్పనిసరి కానుంది.
డిజిటల్ లావాదేవీలను ప్రోత్సహించడం మరియు నగదు వినియోగాన్ని తగ్గించడమే ఈ మార్పుల వెనుక ఉన్న ప్రధాన ఉద్దేశ్యం.
