- రోగులకు రూ.2,500 కోట్ల ఆదా!
క్యాన్సర్ చికిత్స పొందుతున్న లక్షలాది మంది రోగులకు కేంద్ర ప్రభుత్వం భారీ ఊరట అందించింది. మందుల వ్యాపారంలోమితిమీరిన లాభాల శాతానికి (Trade Margins) అడ్డుకట్ట వేస్తూ నేషనల్ ఫార్మాస్యూటికల్ ప్రైసింగ్ అథారిటీ (NPPA) తీసుకున్న నిర్ణయంతో నవంబర్ 9 నుంచి 543 బ్రాండెడ్ క్యాన్సర్ మందుల గరిష్ట విక్రయ ధరలు (MRP) గణనీయంగా తగ్గాయి. ఈ నిర్ణయం వల్ల దేశవ్యాప్తంగా క్యాన్సర్ రోగులకు ఏటా దాదాపు రూ.2,500 కోట్లు ఆదా అవుతాయని అంచనా వేస్తున్నారు.
కొన్ని మందులపై 91% వరకు తగ్గిన ధరలు..
ప్రభుత్వ జోక్యంతో పలు కీలకమైన క్యాన్సర్ మందుల ధరలు భారీగా దిగివచ్చాయి. సామ్‌టెపా (Samtepa 100 mg): గతంలో ఒక ఇంజెక్షన్ వైల్ (Vial) ధర రూ. 80,071.86 ఉండగా, తాజా తగ్గింపుతో అది రూ. 7,150.33 కే లభించనుంది. అంటే ఏకంగా 91 శాతం మేర ధర తగ్గింది. ఇన్సూరెన్స్ లేకుండా తమ సొంత పొదుపు మొత్తాలతో క్యాన్సర్ వైద్యం చేయించుకుంటున్న వేలాది కుటుంబాలకు ఇది చాలా పెద్ద ఊరట నిస్తుందని నిపుణులు చెబుతున్నారు.
ధరలు తగ్గినా చిన్న పట్టణాల్లో మారని తిప్పలు..
మందుల ధరలు తగ్గినప్పటికీ చిన్న పట్టణాలు, Tier-3 నగరాల్లో ఉండే రోగులకు మందులు అందుబాటులోకి రావడం ఇప్పటికీ సవాలుగానే మారింది.
దాదాపు 81.1% మంది క్యాన్సర్ రోగులు తమ సొంత ఊళ్లను వదిలి పెద్ద నగరాలకు వెళ్లి చికిత్స పొందాల్సి వస్తోంది. Tier-3 నగరాల్లో 7.1% మాత్రమే: Tier-3 పట్టణాలకు చెందిన రోగులలో కేవలం 7.1% మందికి మాత్రమే వారి స్థానిక పట్టణాల్లో చికిత్స అందుతోంది. ప్రతి కీమోథెరపీ లేదా డోస్ కోసం మళ్లీ మళ్లీ మెట్రో నగరాలకు ప్రయాణించడం, పని దినాలు కోల్పోవడం, ప్రయాణ-వసతి ఖర్చులు భరించడం వల్ల మందుల ధరలు తగ్గినా స్థానికంగా లభించకపోవడం వల్ల రోగుల కుటుంబాలపై ఆర్థిక భారం కొనసాగుతోంది.
చిన్న నగరాల్లో క్యాన్సర్ మందుల కొరతకు కారణాలు..
అనేక క్యాన్సర్ మందులను నిరంతరం 2 డిగ్రీల నుండి 8 డిగ్రీల సెల్సియస్ ఉష్ణోగ్రత వద్ద మాత్రమే నిల్వ చేయాలి. చిన్న పట్టణాల్లో ఈ రవాణా, నిల్వ సదుపాయాలు తక్కువగా ఉంటాయి.
క్యాన్సర్ మందుల ధరలు ఎక్కువగా ఉండటం, చిన్న దుకాణాల్లో అమ్మకాలు తక్కువగా ఉండటంతో స్థానిక మెడికల్ షాపుల యజమానులు వీటిని నిల్వ ఉంచేందుకు వెనకాడుతున్నారు.
రోగి శరీర బరువును బట్టి మోతాదు (Dosage) నిర్ణయిస్తారు, కాబట్టి నిర్దిష్ట బ్రాండ్ లేదా మోతాదు స్థానికంగా దొరక్కపోతే చికిత్స ఆలస్యమయ్యే ప్రమాదం ఉంది.
మందుల ధరలను ఎలా సరిచూసుకోవాలి?
కేంద్ర ప్రభుత్వం ఆదేశాల ప్రకారం తయారీ కంపెనీలు సవరించిన ఎంఆర్‌పీ (MRP) ధరల జాబితాను అన్ని హాస్పిటల్స్, రిటైల్ మెడికల్ షాపులకు పంపాలి. రోగులు మరియు వారి కుటుంబ సభ్యులు కేంద్ర ప్రభుత్వం నిర్వహిస్తున్న ‘ఫార్మా సహీ దామ్’ (Pharma Sahi Daam) యాప్ లేదా పోర్టల్ ద్వారా తగ్గిన మందుల ధరలను నేరుగా సరిచూసుకోవచ్చు.
