NTA Clarifies On NEET Paper Leak Viral Video | దేశవ్యాప్తంగా సంచలనం సృష్టించిన నీట్ యూజీ (NEET-UG) పునఃపరీక్ష ముగిసిన వెంటనే, మరోసారి పేపర్ లీకేజీ ఆరోపణలు రావడం తీవ్ర కలకలం రేపింది.
ఆదివారం జరిగిన ఈ ప్రతిష్టాత్మక పరీక్షకు ఒక రోజు ముందే, అంటే శనివారమే ప్రశ్నపత్రం లీక్ అయ్యిందంటూ సోషల్ మీడియాలో కొన్ని కథనాలు, ఒక వీడియో విపరీతంగా వైరల్ అయ్యాయి.
ఈ నేపథ్యంలో ‘నేషనల్ టెస్టింగ్ ఏజెన్సీ’ (NTA) తక్షణమే స్పందించి, తాజా ఆరోపణలపై కీలక వివరణ ఇచ్చింది.
టెలిగ్రామ్లో వైరల్ అయిన వీడియో.. ఎన్టీఏ క్లారిటీ..
సోషల్ మీడియా ప్లాట్ఫామ్స్, ముఖ్యంగా టెలిగ్రామ్లో నీట్ ప్రశ్నపత్రం లీకైనట్లు వస్తున్న వార్తలను, వైరల్ అవుతున్న వీడియోను జాతీయ పరీక్షల సంస్థ (NTA) పూర్తిగా తోసిపుచ్చింది. సోషల్ మీడియాలో ప్రచారమవుతున్న ఆ వీడియో పూర్తిగా నకిలీదని (Fake) ఎన్టీఏ స్పష్టం చేసింది.
దేశవ్యాప్తంగా అత్యంత కట్టుదిట్టమైన భద్రతా ఏర్పాట్లు, నిఘా మధ్య ఈ పునఃపరీక్షను విజయవంతంగా నిర్వహించామని అధికారులు వెల్లడించారు. విద్యార్థులు, తల్లిదండ్రులు ఇలాంటి తప్పుడు ప్రచారాలను, పుకార్లను నమ్మవద్దని, పరీక్ష పారదర్శకంగా జరిగిందని ఎన్టీఏ స్పష్టం చేసింది.
