ఛాంపియన్స్ ట్రోఫీ సాధించిన తెలంగాణ పోలీస్!

TG Police Overall Champion | తెలంగాణ పోలీస్ విభాగం జాతీయ స్థాయిలో మరోసారి తన సత్తా చాటింది. మహారాష్ట్రలోని నాగ్‌పూర్‌లో జరిగిన 69వ అఖిల భారత పోలీస్ డ్యూటీ మీట్ (2025-26)లో వరుసగా మూడోసారి ‘ఓవరాల్ ఛాంపియన్’ ట్రోఫీని కైవసం చేసుకుని అరుదైన హ్యాట్రిక్ సాధించింది.

మార్చి 29 నుండి ఏప్రిల్ 3 వరకు జరిగిన ఈ ప్రతిష్టాత్మక పోటీల్లో దేశవ్యాప్తంగా ఉన్న వివిధ రాష్ట్రాల పోలీస్ బలగాలను వెనక్కి నెట్టి, తెలంగాణ పోలీసులు అగ్రస్థానంలో నిలిచారు. 2024లో లక్నో, 2025లో రాంచీలో జరిగిన పోటీల్లోనూ తెలంగాణే విజేతగా నిలవడం విశేషం.

ఈ ఏడాది పోటీల్లో తెలంగాణ బృందం మొత్తం 6 స్వర్ణ, 3 వెండి, 3 కాంస్య పతకాలను సాధించింది. ముఖ్యంగా యాంటీ-సాబోటేజ్ చెక్, వీడియోగ్రఫీ మరియు కంప్యూటర్ అవేర్‌నెస్ విభాగాల్లో ప్రథమ స్థానంలో నిలిచి బంగారు పతకాలను గెలుచుకుంది.

శాస్త్రీయ పద్ధతిలో దర్యాప్తు సహాయాలు (Scientific Aids to Investigation) మరియు పోలీస్ ఫోటోగ్రఫీ విభాగాల్లో రన్నరప్‌గా నిలిచి వెండి పతకాలను దక్కించుకుంది.

సీఐడీ అదనపు డీజీపీ చారు సిన్హా పర్యవేక్షణలో, హెడ్ కోచ్‌లు ప్రతాప్, రామకృష్ణ మరియు టీమ్ మేనేజర్ ప్రసాద్ నేతృత్వంలో శిక్షణ పొందిన ఈ బృందం అద్భుత ప్రదర్శన కనబర్చిందని డీజీపీ బి. శివధర్ రెడ్డి కొనియాడారు.

తెలంగాణ పోలీసుల ఘనతపై ముఖ్యమంత్రి రేవంత్ రెడ్డి హర్షం వ్యక్తం చేశారు. ఈ విజయం రాష్ట్ర పోలీసుల నిరంతర కృషి, క్రమశిక్షణ మరియు వృత్తిపరమైన నైపుణ్యానికి నిదర్శనమని ఆయన అభినందించారు.

ఆధునిక సాంకేతికతను అందిపుచ్చుకోవడంలో, నేర పరిశోధనలో శాస్త్రీయ పద్ధతులను అవలంబించడంలో తెలంగాణ పోలీసులు దేశానికే ఆదర్శంగా నిలుస్తున్నారని సీఎం పేర్కొన్నారు. జాతీయ స్థాయిలో రాష్ట్ర కీర్తిని ఇనుమడింపజేసిన విజేతలకు మరియు వారికి శిక్షణ ఇచ్చిన అధికారులకు ఆయన ప్రత్యేక శుభాకాంక్షలు తెలిపారు.