- పాపులారిటీ పిచ్చితో జీవితాలు నాశనం చేసుకోవద్దని నటి హెచ్చరిక!
Renu Desai cyber crime complaint | సోషల్ మీడియా వేదికగా తనపై అసభ్యకర వ్యాఖ్యలు చేస్తూ, బూతులతో రెచ్చిపోతున్న ఆకతాయిలకు నటి రేణు దేశాయ్ గట్టి గుణపాఠం చెప్పారు.
గత కొంతకాలంగా ఆమె చేసే పోస్టుల కింద కొందరు వ్యక్తులు అత్యంత నీచమైన పదజాలంతో కామెంట్స్ చేస్తూ వేధింపులకు గురిచేస్తున్నారు. దీనిపై సహనం కోల్పోయిన రేణు దేశాయ్, హైదరాబాద్ సైబర్ క్రైమ్ పోలీసులను ఆశ్రయించి ఫిర్యాదు చేశారు.
రంగంలోకి దిగిన పోలీసులు సాంకేతిక ఆధారాలతో దర్యాప్తు చేపట్టి, ఇప్పటివరకు ఆరుగురు నిందితులను అదుపులోకి తీసుకున్నారు.
పోలీసుల విచారణలో నిందితులు చెప్పిన కారణాలు విని రేణు దేశాయ్ దిగ్భ్రాంతికి గురయ్యారు. రేణు దేశాయ్ వంటి సెలబ్రిటీలను తిట్టడం ద్వారా తాము కూడా సోషల్ మీడియాలో ‘ఫేమస్’ అవుతామనే పిచ్చి ఉద్దేశంతోనే ఈ పనులకు ఒడిగట్టినట్లు నిందితులు ఒప్పుకున్నారు.
కేవలం పాపులారిటీ కోసం ఇంతటి నీచమైన పనులకు పాల్పడటంపై ఆమె తీవ్ర విచారం వ్యక్తం చేశారు. నిందితులను త్వరగా గుర్తించి అరెస్ట్ చేసిన పోలీసులకు ధన్యవాదాలు తెలుపుతూ రేణు దేశాయ్ సోషల్ మీడియాలో ఒక వీడియోను విడుదల చేశారు.
ఈ సందర్భంగా ఆమె యువతకు మరియు నెటిజన్లకు ఒక బలమైన హెచ్చరిక జారీ చేశారు. “కేవలం కొంతమంది దృష్టిని ఆకర్షించడం కోసం లేదా ఫేమస్ అవ్వడం కోసం బూతులు తిట్టి మీ విలువైన జీవితాలను జైలు పాలు చేసుకోవద్దు.
అనవసరమైన వేధింపులకు పాల్పడి కెరీర్ను నాశనం చేసుకోవద్దు” అని హితవు పలికారు. సెలబ్రిటీలైనా, సామాన్యులైనా సోషల్ మీడియాలో గౌరవప్రదంగా మెలగాలని, చట్టం ఎవరినీ వదిలిపెట్టదని ఆమె స్పష్టం చేశారు. ప్రస్తుతం రేణు దేశాయ్ చేసిన ఈ వ్యాఖ్యలు నెట్టింట వైరల్ అవుతున్నాయి.
