Pawan Kalyan Donation | సార్వత్రిక ఎన్నికలు సమీపిస్తున్న వేళ ఆంధ్ర ప్రదేశ్ లో టీడీపీ జనసేన కూటమి (TDP Janasena Alliance) విజయం సాధించాలని ప్రయత్నాలు ముమ్మరం చేస్తోంది. ఓ వైపు టీడీపీలో బాబు సభల్లో పాల్గొంటున్నారు.
మరోవైపు జనసేన అధినేత పవన్ పార్టీ నేతలతో సమావేశం అవుతూ ఎన్నికలకు సమాయత్తం చేస్తున్నారు. అందులో భాగంగా, సోమవారం ఉమ్మడి విశాఖ జిల్లా నేతలతో సమావేశమై పార్టీ నేతలకు కీలక సూచనలు చేశారు.
టీడీపీ-జనసేన కూటమి తప్పకుండా అధికారంలోకి వస్తుందన్నారు. పార్టీ కోసం కష్టపడిన వారికి తప్పుకుండా సరైన ప్రాధాన్యం ఉంటుందన్నారు. ఆంధ్రప్రదేశ్ ప్రజలు స్పష్టమైన తీర్పు ఇవ్వబోతున్నారని పవన్ పేర్కొన్నారు.
ఈ నేపథ్యంలో ఎన్నికలను దృష్టిలో ఉంచుకొని క్షేత్రస్థాయిలో పార్టీ బలాన్ని సద్వినియోగం చేసుకోవాలని పిలుపునిచ్చారు. రాష్ట్రంలో టీడీపీ జనసేన కూటమిని గెలుపు కోసం ప్రతి కార్యకర్త ముందుకెళ్లాలని ఆదేశించారు.
2019 తర్వాత జనసేన కోసం పని చేసిన వారికి తాను అండగా ఉంటానని భరోసా ఇచ్చారు. ఏపీ అభివృద్ధికి సుస్థిర పాలన అవసరమని, అందుకోసం అందరూ కృషి చేయాలన్నారు.
అనంతరం పార్టీ బలోపేతానికి, పార్టీ పక్షాన ఎన్నికల నిర్వహణ కోసం రూ. 10 కోట్లు తన స్వార్జితాన్ని నిధిగా ఇవ్వనున్నట్లు పవన్ ఈ సమావేశంలో ప్రకటించారు.
