MLA Lasya Nanditha | హైదరాబాద్ ఓఆర్ఆర్ (ORR)పై జరిగిన రోడ్డు ప్రమాదంలో కంటోన్మెంట్ ఎమ్మెల్యే లాస్య నందిత (Lasya Nanditha) మృతి చెందిన విషయం తెలిసిందే.
శుక్రవారం తెల్లవారుజామున జరిగిన ఈ ప్రమాదంలో లాస్య స్పాట్ లోనే మరణించారు. సాయంత్రం ఆమె అంత్యక్రియలను ప్రభుత్వ లాంఛనాలతో నిర్వహించనున్నారు.
కాగా, ఎమ్మెల్యే గా ఎన్నికైన నాటి నుంచి లాస్య మూడు ప్రమాదాలు ఎదుర్కొన్నారు. 2023 డిసెంబర్ లో సికింద్రాబాద్ లో ఓ కార్యక్రమానికి హాజరైన లాస్య ఓవర్‌లోడ్ కారణంగా లిఫ్ట్ ఆరు అడుగుల ఎత్తులో కూలిపోవడంతో అందులో ఇరుక్కుపోయారు. ఆ ప్రమాదం నుంచి క్షేమంగా బయటపడ్డారు.
రెండోసారి ఫిబ్రవరి 13న కేసీఆర్‌ సభకు హాజరయ్యేందుకు నల్గొండ వెళ్తుండగా రోడ్డు ప్రమాదం నుంచి స్వల్ప గాయాలతో బయటపడ్డారు. ఈ ప్రమాదంలో ఒక హోంగార్డు మృతి చెందాడు.
తాజాగా మూడోసారి శుక్రవారం జరిగిన ప్రమాదంలో ప్రాణాలు కోల్పోయారు. తండ్రి మరణించిన సరిగ్గా ఏడాదికే లాస్య కూడా మృతిచెందడంతో ఆమె కుటుంబంలో తీవ్ర విషాదఛాయలు అలుముకున్నాయి.
