- యువత, మహిళలే లక్ష్యంగా వ్యూహం!
TVK Contests Alone In TN | తమిళనాడు శాసనసభ ఎన్నికల (Tamilnadu assembly elections) సమరం ముంచుకొస్తున్న వేళ, రాష్ట్ర రాజకీయాలు ఆసక్తికర మలుపులు తిరుగుతున్నాయి.
ఏప్రిల్ 23న ఒకే విడతలో జరగనున్న ఈ ఎన్నికల్లో ప్రధాన పార్టీలైన డీఎంకే (DMK), ఏఐడీఎంకే (AIADMK) ఇప్పటికే తమ పొత్తులను ఖరారు చేసుకోగా.. సూపర్ స్టార్ దళపతి విజయ్ స్థాపించిన ‘తమిళగ వెట్రి కళగం’ (TVK) మాత్రం ఒంటరిగానే బరిలోకి దిగాలని నిర్ణయించుకుంది.
పొత్తుల ప్రచారానికి తెర
విజయ్ పార్టీ కాంగ్రెస్తో పొత్తు కోసం ప్రయత్నించిందని, అలాగే ఎన్డీయే (NDA) కూటమిలో చేరాలని బీజేపీ నేతలు చర్చలు జరిపారని గత కొంతకాలంగా జోరుగా ప్రచారం సాగింది.
అయితే, జాతీయ మరియు స్థానిక ప్రధాన పార్టీలతో ఎటువంటి పొత్తు లేకుండానే, సొంత బలంపైనే ఎన్నికలను ఎదుర్కోవాలని విజయ్ గట్టి నిర్ణయం తీసుకున్నట్లు తెలుస్తోంది.
అవినీతి రహిత పాలన, ద్రావిడ వాదం వంటి అంశాలను ప్రధాన ఎజెండాగా చేసుకుని ఆయన ప్రచారాన్ని హోరెత్తిస్తున్నారు.
మహిళలు, యువతే ప్రధాన అస్త్రం
తొలిసారి ఎన్నికల బరిలో నిలుస్తున్న విజయ్.. యువత మరియు మహిళల ఓట్లను అత్యంత కీలకంగా భావిస్తున్నారు. ఈ క్రమంలోనే ఇటీవల మహిళల కోసం వరుస పథకాలను ప్రకటించి ఆకర్షించే ప్రయత్నం చేశారు. తన కోట్లాదిమంది అభిమానుల మద్దతే అతిపెద్ద బలంగా విజయ్ రాజకీయం చేస్తున్నారు.
వ్యక్తిగత ఇబ్బందులు.. రాజకీయ సవాళ్లు
ఒకవైపు రాజకీయంగా దూసుకుపోతున్నా, విజయ్ చుట్టూ వ్యక్తిగత జీవితానికి సంబంధించిన క్లిష్ట పరిస్థితులు నెలకొన్నాయి.
ముఖ్యంగా ఆయన విడాకుల అంశం, మరో నటితో సన్నిహిత సంబంధం ఉందనే ప్రచారం తమిళనాట రాజకీయంగా విజయ్కు కొంత ఇబ్బందికరంగా మారింది. ఈ వ్యక్తిగత అంశాలు ఎన్నికలపై ఎలాంటి ప్రభావం చూపుతాయనేది చర్చనీయాంశమైంది.
తమిళనాట ఎప్పుడూ ద్విముఖ పోటీ (DMK Vs AIDMK) ఉండే పరిస్థితుల్లో, విజయ్ ఒంటరి పోరు ఏ పార్టీ ఓట్లను భారీగా దెబ్బతీస్తుంది? ఆయన ఎన్ని సీట్లు, ఓట్లు సాధిస్తారు? అనేది ఇప్పుడు సర్వత్రా ఆసక్తి రేపుతోంది.
