Puri Rath Yatra 2023: ఒడిశాలోని ప్రముఖ ఫుణ్యక్షేత్రం, చార్ ధామ్ యాత్రలో ఒకటైన పూరీ ఆలయం జగన్నాథుని రథయాత్రకు (Puri Jagannath Rath Yatra) సిద్ధమైంది. పూరిలో జరిగే ఈ వార్షిక ప్రతి సంవత్సరం ఆషాడ శుద్ధ తదియ రోజున మొదలవుతుంది.
ఇక్కడ దేవతలైన జగన్నాథుడు (విష్ణువు యొక్క అవతారం), బలభద్రుడు మరియు సుభద్రలను రథాలపై పెద్ద ఊరేగింపుగా తీసుకువెళతారు.
అందులో భాగంగానే మంగళవారం ఉదయం 9 గంటలలోపు జగన్నాథ, బలభద్ర, సుభద్ర, సుదర్శనుల విగ్రహాలను రథాలపై ప్రతిష్ఠిస్తారు.
మధ్యాహ్నం ఒంటి గంటకు పూరీ రాజు గజపతి దివ్యసింగ్‌దేవ్‌ రథాలపై బంగారు చీపురుతో ఊడ్చిన తర్వాత రథయాత్ర ప్రారంభమవుతుంది.
మధ్యాహ్నం 3 గంటలకు భక్తులు రథాలను లాగుతారు. సాయంత్రంలోగా రథాలు గుండిచా మందిరానికి చేరుకునేలా ఏర్పాట్లు చేశారు.
ఈ రథయాత్రకు (Puri Rath Yatra 2023) ప్రపంచ నలుమూలల నుంచి లక్షలాదిగా భక్తులు తరలివస్తారు. ఈ సారి సుమారు 10 లక్షల మంది వస్తారని ప్రభుత్వం అంచనా వేసింది. దీంతో భక్తులకు అసౌకర్యం కలగకుండా ఒడిశా ప్రభుత్వం అన్ని ఏర్పాట్లు చేసింది.
లక్షలాది మంది అశేషమైన భక్త జనసంద్రం మధ్య కదులుతున్న జగన్నాథుడి రథచక్రాలు
ప్రధాన ఘట్టం పూరీలోని ప్రసిద్ధ జగన్నాథ దేవాలయం మరియు చుట్టుపక్కల జరుగుతుంది. ఊరేగింపు ఆలయం నుండి ప్రారంభమై తిరిగి ఆలయానికి చేరుకోవడానికి ముందు పూరీ వీధుల గుండా కొనసాగుతుంది.
నందిఘోష్‌, తాళధ్వజ, దర్పదళన్‌ రథాలు సోమవారం సాయంత్రం 6.30 గంటలకు ఆలయం వద్దకు చేరుకున్నాయి. దేవతలను తీసుకెళ్లే గుండిచాదేవి మందిరాన్ని పూలతో సర్వాంగ సుందరంగా అలంకరించారు.
రథయాత్రలో భాగంగా జగన్నాథుడు రథాలపై భక్తుల మధ్యకు వచ్చి, పెంచిన తల్లి అయిన గుండిచాదేవి ఆలయానికి వెళతాడు. 9 రోజులు అమ్మ వద్దే ఉండి ఆమె పెట్టే గోరుముద్దలు ఆరగిస్తాడు.
జగన్నాథ యాత్ర నేపథ్యంలో పూరీకి సోమవారం ఉదయం నుంచి భక్తుల రాక గణనీయంగా పెరిగింది. ఆ మార్గంలో రైళ్లు, బస్సులు రద్దీగా వెళుతున్నాయి.
భారీ జనసంద్రం నేపథ్యంలో ఒడిశా పోలీస్ యంత్రాంగం భద్రతను కట్టుదిట్టం చేసింది. ఎక్కడికక్కడ బారికేడ్లను ఏర్పాటు చేసి, పోలీసులు వాహనాల రాకపోకలను నియంత్రిస్తున్నారు.
భద్రత కోసం పలు చోట్ల సీసీ కెమెరాలను ఏర్పాటు చేశారు.
కన్నుల పండువగా జరిగే ఈ పూరీ జగన్నాథుడి రథయాత్రకు వ్యక్తిగతంగా హాజరు కాలేకపోతే, వివిధ టెలివిజన్ ఛానెల్‌లు మరియు ఆన్‌లైన్ ప్లాట్‌ఫారమ్‌లు తరచుగా పండుగను ప్రత్యక్ష ప్రసారంలో వీక్షించవచ్చు.
భక్తులు జగన్నాథ రథయాత్రను ఉదయం 8 గంటల నుండి డీడీ-భారతి, డీడీ-ఒడియా మరియు ఇతర దూరదర్శన్ ఛానెల్‌లతో సహా వివిధ టీవీ ఛానెల్‌లలో ప్రత్యక్షంగా వీక్షించవచ్చు.
