ISRO GSLV F16 | భారత అంతరిక్ష పరిశోధన సంస్థ (ISRO) ఖాతాలో మరో విజయం చేరింది. బుధవారం సాయంత్రం ఇస్రో చేపట్టిన GSLV-F16 రాకెట్ ప్రయోగం విజయవంతం అయింది. శ్రీహరికోటలోని సతీష్ ధవన్ స్పేస్ సెంటర్ నుంచి GSLV-F16 రాకెట్ ను ఇస్రో విజయవంతంగా ప్రయోగించింది.
ఇస్రో, నాసా సంయుక్తంగా అభివృద్ధి చేసిన నాసా-ఇస్రో సింథటిక్ అపెర్చర్ రాడార్ NISAR ఉపగ్రహాన్ని సాయంత్రం 5:40 గంటలకు ప్రయోగించారు. 743 కి.మీ. ఎత్తులో సన్-సింక్రోనస్ ఆర్బిట్లోకి విజయవంతంగా చేరినట్లు ఇస్రో అధికారులు ధ్రువీకరించారు.
ఈ ఉపగ్రహం ప్రతి 12 రోజులకు భూ ఉపరితలం మీద, అలాగే మంచు కప్పబడిన ఉపరితలాలను, సముద్రాలను చిత్రీకరిస్తుంది. భూమిపై మారుతున్న వాతావరణ పరిస్థితులు, సహజ ప్రమాదాలను పర్యవేక్షించడానికి ఈ ఉపగ్రహం దోహదపడుతుంది.
